點解任志剛會同呢位小朋友合照呢？（圖一）原來小朋友叫做張宗賜，來自聖公會田灣始南小學，佢將1997年發行嘅紀念硬幣上嘅圖案，創作咗幅畫，贏咗金管局搞嘅全港小學生圖畫創作比賽冠軍。人仔細細但創意十足，任總都甘拜下風。
張同學嘅得獎作品內容仲離奇古怪，原來佢係用咗七種紀念幣嘅圖案，包括當年五蚊紀念硬幣上嘅蝙蝠、十蚊嘅青馬大橋、兩蚊嘅和合二仙、一蚊嘅麒麟、五毫嘅牛、兩毫嘅蝴蝶形風箏及一毫嘅帆船，構成呢幅圖畫（圖二）。
今次比賽有5000多名學生參加，最後由55間學校選出151份作品，由金管局評審，優勝作品有13份，評分係根據主題、創意、技巧及整體質素，冠亞季軍作品𠵱家喺金管局資訊中心展出，展期至3月4日。之後會同其他得獎作品，放喺金管局中環國際金融中心2期嘅辦事處公眾範圍展出。