陳德霖搞thinktank，擺明同一國兩制研究中心及香港明天更好基金搶生意，一朝天子一朝臣，冇法啦。講開明天更好，佢哋阿袁金浩上周五晚喺合和六十樓舉行春茗，都算夠晒高，佢話正同中聯辦研究，喺青藏鐵路通車後，安排香港傳媒高層去坐吓，八方都好有興趣，可惜中方唔准《蘋果》北上採訪，同西藏緣慳一面。
袁金浩請到中央政策組組長劉兆佳出席，八方冇見佳叔好耐，覺得佢氣色好好多，莫非煲呔真係好湊過老董？佳叔叫大家唔好報道佢喺飯局中講嘢內容，雖然大家都唔係問得好尖銳，主要都係環繞特區政府嘅新班子，以及佢位新徒弟劉細良。問兩問，大家忽然覺得中策組有咁多人姓劉，就索性叫佳叔做大劉，細良做細劉。佳叔一聽到呢個稱號就馬上有反應，話自己變咗做劉鑾雄，認真大件事；至於細良變做細劉（鑾鴻），大家都係細，又幾蹺喎。
傳真︰2623-9278
電郵︰[email protected]
