好快又到○七年選特首，但左派陣營不時傳出雜音，好似資深人大吳康民咁，噚日就批評煲呔對人大唔熟悉，同人大溝通唔夠，連政改呢啲咁重要嘅政策，都唔搵人大傾傾，希望煲呔同人大多啲溝通。吳人大𠵱家講唔到係咪支持煲呔連任，話要睇埋呢一年佢點做先講。
噚日廣東社團聯會搞團拜，吳康民話，總之唔好咁快斷言支持煲呔，佢都係有獨立思考，都要睇吓煲呔政績，喺未來一年搞唔搞得掂民生同經濟，如果𠵱家就話支持佢，咁就係盲目啦！
平心而論，話晒煲呔都會約吓啲人大傾偈，老董年代反而冇乜，如果話支持煲呔係盲目，咁以前支持老董連任嘅咪仲盲目？睇嚟左派對曾蔭權都仲有唔少對抗情緒，怕且嚟緊三月人大會議，煲呔都要有心理準備，預咗俾人狂隊喇。
傳真︰2623-9278
電郵︰[email protected]