日股唔生性，散275點，港股則威猛，升122點。
油價升，油股升，石油C輪生猛，早段撲落去到尾市已可收割，再高價追貨則要諗諗，暫時忍住。
港股擺脫日股影響，似乎有機會再上去，揀落後股，炒佢哋嘅C輪搵食可也。
電盈C輪9773：電盈（008）收5.40元，升1格。電盈兩周前借住推出NOW嘅氣勢，高見5.75元，𠵱家唞夠氣，再嚟過，當然唔係期望呢隻眾人傷心股會帶挈股東發達，只係博佢上番三兩毫子。
揀電盈C輪埋手，9773幾乎係唯一選擇。隻輪6月底夠鐘，輪價67仙，溢價1.3%，槓桿率8.1倍（有效6.3倍），引伸波幅26.2%。
滙控C輪3400：滙控（005）見過129.90元，收129.40元，仍有進賬0.20元。
九十幾隻滙控C輪，只有3隻下跌，3400係其中之一，見27仙後低收24.8仙，唔見兩格。滙控追落後，就買呢隻。
3400喺4月初到期，溢價0.1%，槓桿率52.2倍（有效29.6倍），引伸波幅12%。
若問點解昨日其他滙控C輪升佢跌，答案可能係3400街貨多，達93%，即係463球。
章盛