聽日係三條二（2月22日），「易易易」咁好嘅日子，好巧合咁特別多大事發生！根據通勝，2.22宜會友、出行、嫁娶、動土等等，但忌開渠放水。咁就弊嘞，財爺唐英年揀呢日宣布預算案，庫房轉虧為盈，大家等緊減稅派糖，通勝偏偏話忌開渠放水，財爺擇正呢日宣布預算案，納稅人今年未必聽到好消息嘞。
政府會唔會還富於民仲未知，但普度眾生嘅觀音大士應該唔會托手踭，正月廿六（今個星期四）就係觀音開庫大日子，相信唔少善信聽晚會一早到觀音廟排隊，搵觀音娘娘幫手，隨時好過靠財爺。
除咗萬眾期待嘅預算案同觀音開庫，天主教香港教區主教陳日君，據講亦會喺聽日獲教廷任命為樞機，梵蒂岡唔睇通勝，但咁啱聽日係羅馬天主教會建立聖伯多祿大殿嘅紀念日，按慣例教宗會喺呢日宣布新樞機名單，對天主教徒而言，呢日亦非常之重要。
傳真︰2623-9278
電郵︰[email protected]