狗年新正頭未過，煲呔已經密鑼緊鼓準備再戰江湖，連至勁嘅智囊組織「智經」都不避嫌周圍向啲有錢佬打心口，埋定班，就知來勢洶洶，非同小可。
煲呔埋班 財爺執輸
嗱，如果真係想同煲呔爭一日長短，唔好再怠慢，好似唐唐咁，唔好再埋頭埋腦同煲呔做預算案，以為得米，人哋已經喺水底做緊嘢，無論聽日發表嘅預算有幾威，煲呔都一定沾光不少，因為始終佢係特首。
八方姑且為唐唐計數，覺得佢今次出馬參選，可能犧牲好大，皆因法例規定，特首競選連任，可以唔使辭職，以免出現領導真空，而唐唐呢種在任高官參選，就要先辭官職，即係唔做財政司司長，正如煲呔去年要先唔做署理特首一樣。
呢個世界「小財唔出，大財點會入」，唐唐如果小小犧牲都唔肯，就乖乖哋等二○一二年啦。不過，老實講，煲呔連任，你都未必有財政司司長做，因為聽聞個位已有人選，就係煲呔忠實擁躉、兩次助選都站得最前嘅前任金管局副行政總裁陳德霖。
所以唐唐唔選都未必有大作為，分分鐘要聽唐爸爸同唐媽媽話，返屋企幫家族生意手，過番大老闆嘅美好生活。
肥龍讓位 升官在望
唔知煲呔同肥龍係咪怕唐唐把心一橫，出嚟同佢撼過，較早前又有消息話，肥龍向煲呔推薦唐唐更上一層樓，明年如果煲呔連任成功，就畀個政務司司長佢做，等唐唐唔好心大心細，乖乖哋等升官。
𠵱家就要睇北京有乜新指示啦，如果阿爺早啲話冇得競賽，煲呔做多五年，咁唐唐可以考慮吓肥龍方案，學習做一人之下，七百萬人之上，收吓把口再上一層樓；而如果阿爺話歡迎挑戰，唐唐贏面仍然有，與其聽煲呔擺布，不如選一選，做吓特首候選人，過吓癮都好。
傳真︰2623-9278
電郵︰[email protected]