可知3kg瓦通紙，以紙皮箱回收市價$0.55/kg計，只可以換到$1.65，買個菠蘿包都唔夠；同樣是3kg瓦通紙，肯花上4小時𠝹𠝹貼貼的工序，換來是一張可以出得廳堂的茶几。估到你會話現成買張乾手淨腳，何必要嘥時間；我明，學人講環保廢物利用做手作仔，一向都要花時間；之不過，今次呢張手作仔茶几，靚仔程度媲美好有無印Feel的瓦通紙傢具；與其畀錢買件紙傢具咁笨，索性自己砌掂佢。
記者：招佩珊
攝影：陳智良
模特兒：Fiona@Salvador
自𠝹凹凸坑 擺杯無走位
用瓦通紙做手作仔，離不開相架或飾物盒，實情是較大件的傢具亦可以瓦通紙作材料，最佳參考素材有宜家的儲物箱，又或者無印的抽屜。瓦通紙傢具實際上睇就靚仔，用就唔襟使，於是，今回用瓦通紙自砌茶几，花費無幾，用殘用舊丟掉都唔肉痛，之不過要花時間同心機；完成時間接近4小時，皆因呢張茶几夠出位，枱面有度身設計的凹凸位擺杯放雜物，唔怕粗心大意隨手一掃，將枱面雜物掃落地，而工夫就是花在度位𠝹紙。呢張示範作為兩小口子而設，放到兩隻杯，長方形凹位可放遙控器再加多盞枱燈Fit到痹，但切忌太貪心𠝹出太多凹凸位，一來枱面花晒唔好睇，二來枱面變薄托唔起。
材料
20"×30"瓦通紙30塊
枱燈（燈座連燈膽）1套$70
參考紙樣
步驟
小貼士
宜用透明的萬能膠，黏貼瓦通紙夠穩固；瓦通紙最好揀雙面（即兩面平滑），叠埋黐好後承托力較強。
㗎仔搞鬼作
示範1
多層茶几（左）及工作枱＋衣物櫃（右）
㗎仔的DIY手藝絕對可以化腐朽為神奇，隨手揭開日本的傢具部屋雜誌，不乏自製傢具示範作，當中發現以下呢幾款瓦通紙作品，最頂癮要數那個衣物櫃，上半部是一張工作枱，下半部就加條鐵通及布簾，變成有遮有掩的衣物櫃。又或者可以學似呢個㗎仔咁，下半部唔擺雜物，索性用來作休息間，無房要瞓廳都叫做有個竇。
示範2
梯級形茶几
同樣是𠝹空瓦通紙中間部份，由上層的大長方形至底層的小長方形，營造一級級落的層次感，枱上放上玻璃，中空部份更可放裝飾物。
示範3
和式層架
最簡單易做，𠝹出3種不同長度的瓦通紙，由底層最長叠高黏實到頂層最短，完成後再噴上啡色漆油，便成了呢款放小擺設的3級層架。
