呢期彩票股好似食咗瀉藥跌唔停，但昨日就終於見到中民燃氣（681）同埋中國蜂業（8156）反彈，中民升8.2％，收0.66元，中國蜂業升2.13％，收2.40元。但彩票股龍頭華彩控股（8161）就仍然未止瀉，再跌8.59％，收1.81元。
華彩近期頻頻回購，兼且努力向投資者解畫，但仍然未能扭轉跌勢。經紀黃話，華彩股價累積升幅太大，加上曾經批股集資，令市場上街貨增加好多，自然唔係咁容易就止跌回升。至於中民，由於有個對沖基金坐咗大批貨，隻股升定跌，好大程度係睇佢哋嘅行動，隻股上周急跌，據講同呢個基金出貨有關。
另外，早排熱爆的新股精熙國際（2788），在熱鬧過後，陸續有回吐。昨日一度跌至3.30元，最後抽番上3.50元收市，計落仍跌5.4％。精熙現價比起招股價2.20元仍高出好多。
經紀黃話，其實芬佬好鍾意精熙，但因為頭兩日搶高得過份，所以先計數，等股價回順再買過，到時見芬佬上車，不妨搭轉順風車。
慕容小初