數獨（Sudoku）熱爆香港，連曾鈺成都忍唔住要試吓。阿曾嘅黨友話，近期成日見到阿曾一邊開會，一邊揸住支筆玩數獨，仲不時低頭靜思，睇怕都係諗緊點樣填晒嗰八十一個格仔。
阿曾鍾意玩數獨唔出奇，事關佢一直係數學奇才，六八年港大數學系一級榮譽畢業，之後仲任職數學系導師，有關數學嘅新玩意，應該都係佢嘅杯中物。而且數獨遊戲可以訓練邏輯思維，最鍾意同人辯論嘅佢，可以藉此鍛煉吓㖭。
身為大律師嘅民建聯黨友蘇錦樑就話，其實阿曾另一個嗜好，就係玩CrosswordPuzzle（填字遊戲），所以佢已經諗定，等阿曾星期四應青年民建聯邀請，喺講座中分享辯論要訣之後，送上一副巨型填字遊戲做紀念品，等佢可以慢慢歎喎。
傳真︰2623-9278
電郵︰[email protected]