吃鹿鞭壯陽、飲木瓜奶豐胸，以形補形是否真有其事？不諳，不過有長腿姐姐美譽外號「小栢芝」的郭芯其卻這樣說：「由小到大我都鍾意食腿，雞腿、鴨腿、豬腿無一不歡，連田雞腿都唔放過呀，食得腿多可能對腳會變長啩？」真又好假又好，反正她推介的法國田雞腿與墨西哥雞髀碟碟滋味，就信她一次捧捧場喇。
記者：李智聰
攝影：林栢鈞
髮型：Kel@Hair
服裝：ClubX@LCX、Kitterick
BB'sBistro：露天雅座吹吹風
說到吃，20歲的郭芯其立時眉飛色舞，別看她高高瘦瘦，原來嗜好是四處尋吃，這間「BB'sBistro」就是她推介的食店之一：「呢間法國餐廳有道菜好過癮，叫法式黑醋汁煎田雞腿，我一食上癮，腳撐撐田雞腿好鬼死大隻，肉質夠厚又彈牙，好正！每次幫襯都要食番十隻八隻至夠喉，如果同大班Friend嚟，就必點海鮮拼盤。」其實「BB'sBistro」也是小記經常捧場的地方，論食物，這裏主打法國菜，海鮮更是招牌貨；論裝修，店子環境也不俗，郭芯其是藝人，喜歡坐VIP房享受私人空間，我則喜歡露天雅座，一來可以吹吹風，感受諾士佛臺街頭一份閒情逸致，二來一眼關七，可以邊食邊昅，昅穿梭街頭的靚女，眼睛味蕾雙重享受。
法式黑醋汁煎田雞腿$76
法國田雞腿比本地田雞腿大2倍，體積比食指還要大，執上手如雞翼般好揸手。芯其：「廚師先用高溫燒熱隻鑊，淋黑醋汁煎田雞腿，燒到田雞腿滲出肉汁先夠香，酸酸哋好醒胃。」
蟹肉海蝦牛油果沙律$98
芯其：「食沙律都唔可以求其是但，呢道菜就材料豐富兼好味，牛油果、皺皮瓜、鮮蟹配海中蝦，當主菜食已經好飽肚。」
超級海鮮拼盤$688
芯其：「每次侍應拎呢個拼盤上枱，我同班Friend都會嘩一聲，因為佢份量大到佔咗餐枱一半，裏面有生蠔、青口、生蝦，最緊要有我至愛嘅美國肉蟹同澳洲蜆。」確實懂吃，美國肉蟹「死」得刁鑽，每一隻也是急凍至死，確保肉質不會收縮。
BB'sBistro（23162212）
地址：尖沙嘴諾士佛臺13-13a地舖
營業時間：12:00nn-3:00am
座位：100個
QuePasa：裝修闊落簡而清
芯其確實饞嘴，吃完田雞腿又想吃雞腿，這次她帶我到天文台圍，這條小街是新開發的飲食點，開業2個月的「QuePasa」討到芯其歡心：「呢度啲菜式比較香口，每次都會破壞晒我嘅減肥大計，不過真係忍唔到口，咁多款雞髀當中，椒茸橙汁焗雞髀係我食過最惹味嘅，食完一隻又一隻，真係令我又愛又恨，不過美食當前，算罷喇。」
椒茸橙汁焗雞髀$138
雞髀用橙汁醃製兩日兩夜，加上紅洋葱、辣椒茸等配料入爐焗製，雞髀本身帶橙汁的酸甜，又把椒茸的香辣全數吸收。芯其：「辣辣哋好香，雞髀肉夠滑有咬口，最喜歡嗰陣香橙味。」
些梨酒醋汁扒帶子$65
芯其：「帶子大大粒，香甜些梨酒將帶子嘅鮮味全部迫晒出嚟，畀大家一個貼士，食呢道菜唔好要全熟，7成熟剛剛好，入口最甜最鮮嫩。」
鮮芒果醬沙沙燴石斑$138
味濃搶口，以芒果醬作配料，加辣椒、白酒醋、番茄茸及墨西哥沙沙醬燴石斑。芯其：「魚肉將醬料照單全收，香氣撲鼻，我鍾意食芒果同魚，呢道菜當然唔會放過啦！」
西班牙龍蝦海鮮飯$158
想不到芯其也是個飯桶：「我推介呢個海鮮飯，有齊龍蝦、青口、蜆、魷魚，特別在撈埋西班牙腸仔，腸仔有啲似煙肉，不過味道更香濃，同海鮮好夾。」
QuePasaTequilaBarCantina
電話：23162525
地址：尖沙嘴天文台圍8號2樓
營業時間：星期日至三4:00pm-2:00am，星期四至六4:00pm-3:00am
座位：80個
