噚晚金鐘好熱鬧，事關上海實業同南華早報，分別喺萬豪及港格搞活動，前者開春茗酒會，後者就做基金經理頒獎。兩個活動唔同性質，賓客各異，所以即使撞期，都無出現搶客情況，兩頭騰嘅，睇怕得港交所總裁周文耀，同埋一眾喺金鐘採訪嘅傳媒！
兩個酒會各有捧場客，上實搵咗中聯辦副主任鄭坤生，同埋行會召集人梁振英主禮，又有舞獅慶祝；至於南早個邊都唔弱，有日日趕幾場嘅馬時亨做主禮嘉賓。之不過，以賓客級數而言，始終都係上實稍勝，所以一眾傳媒影完馬仔之後，就陸續轉場到上實。
華華喺上實處，見到呢間上海駐港機構好多捧場客，例如鄭裕彤、邱德根、董建成、陳永棋、黃志祥等富商，睇嚟上海仍有好多商機。轉頭又見到紅籌之父梁伯韜、同埋就快去上海賣咖啡嘅總商會翁以登、上海總會李和聲等人到場，咁多人支持，難怪上實蔡來興主席全晚都四萬咁口，重親自招呼梁振英，遞埋碟攞埋食物！
由於有唔少上海人喺度，所以場內不時都聽到「儂」「儂」聲嘅上海話，蔡主席同一眾公司高層一行埋，上海話就不離口，但對記者提問，就走夾唔抖，話今晚好多賓客來咗，唔得閒接受訪問！
李華華
讀者如有任何意見或報料，歡迎發送電郵至[email protected]。