爆機狂迷：《超．龍珠Z》鬥到出街　布歐偷招出龜波氣功

插卡遊戲殺入機舖都有一段時間，除咗足球、賽車Game經常玩到之外，再數落就係格鬥Game！曾令到本港漫畫迷風靡咗廿年嘅《龍珠Z》，最近又再鹹魚翻生搬入機舖！加入插卡呢項新玩法勢在必行，但更抵死嘅係悟空、比達等角色，竟可藉戰鬥學習其他角色嘅必殺絕招，龜波氣功唔再係悟空專利！

記者：陳國輝
攝影：黃子偉
ImageBoy：Otto、Fung（Phonographic）
鳴謝：太田
(C)BANPRESTO2005.

講到對《龍珠》最不離不棄嘅，肯定係㗎仔！自從街機版《超．龍珠Z》推出之後，日本BANPRESTO就搞咗個全國格鬥大賽，由細細間機舖一直打到全國賽，就好似玩「天下一無術大會」咁，聽落勁爆笑之餘，班「選手」重好認真狂操機！雖然香港無聲氣話搞比賽，但有消息指《超．龍珠Z》極有可能喺PS2出移植版，到時大可喺屋企密密練功，再走出街同人較量都得啦！

■出龜波氣功唔再係悟空專利，就算弱如芝芝都有機會「偷招」學識。

■何謂漫畫化？就係擊中對方嗰陣，連日文字都標埋出嚟，勁有Feel！

玩插卡升級學招

如果拎堆卡出嚟晒冷鬥多，一定唔係佢強項。事關《超．龍珠Z》同《VirtualFighter》、《鐵拳5》一樣，只設一張主要儲存卡，圖案設計則分別有5款，唔似得其他足球卡Game、三國誌咁，有齊個別角色能力值咁細緻！不過，每當打贏一場比賽之後，角色Power就會提升，換言之，贏得場數愈多，你嘅角色就愈勁！
至於每次都打輸嘅玩家亦唔使灰心，喺《超．龍珠Z》系統入面，特別加咗項「偷招」技術，假如經驗值累積到某一點嘅時候，玩家就可以學識更多招式，例如悟空會學識超龜波氣功、元氣彈以及瞬間移動等攻防招，而最過癮嘅，佢重能夠「偷學」其他人絕技，好似魔童會使用元氣彈，芝芝識得出龜波氣功等！當然，不論輸贏都會學識新招，喺咁多代龍珠格鬥遊戲當中，都可算係招式最多、又最豐富一集。

■「龍珠卡」只作儲存之用，5款設計好易儲齊。

■玩過500次，又要換新卡重新儲經驗，似乎唔多User-friendly！

漫畫化似打街霸

升級同偷招系統固然係遊戲一大賣點，但講到《超．龍珠Z》嘅背景，機迷肯定估唔到！除咗勁漫畫化嘅人物角色、場地設計由《龍珠》作者鳥山明親自操刀之外，原來遊戲系統由「格鬥之父」船水紀考負責。旗下大作連阿伯都聽過，就係CAPCOM名作《街頭霸王2》！不過，《超．龍珠Z》擺脫咗《街霸》嗰種2D打法，採用全3D舞台，除咗可以四圍走，四圍避，就連場景上每一座山或者每一幢大廈，唔夠打嗰陣都可變成棲身之所！但係，裏面任何嘢都會被擊碎，當避到冇得匿嘅時候，惟有硬食，比起《街霸》淨係識打爛啲木桶，簡直真實百倍！
隻Game出咗冇耐已有高手話鑽研到「屈招」！據《超．龍珠Z》發燒友解釋，條件係必須選用人造人17號或18號，當對方採取以擋嚟化解招式嗰刻，敵人會背向自己，此時便可繼續出招攻擊，一係佢就會逐滴血慢慢扣；萬一唔擋嘅話，佢就要硬食一招，扣嘅能源會更多！