Hea：成班Friend睇展覽做晒主角

有無試過，行街被人話你上鏡，可以做Model，甚至明星？究竟你知道拍電影有幾難？個個少男少女都發明星夢，不如去香港電影資料館睇睇最新的電影展覽，就知拍戲一點也不易，只是場景的選擇就大有學問。嫌齋睇悶，大可約埋幾個friend去排戲，當正自己係演員，滿足吓自己，發個明星夢囉！
記者：馬靜兒　
攝影：陳陶鈞
Model：Becky、Wysan、Markson&Phoebe@Salvador

Cut！

電影人撐場

咪以為這個「動．感．現場展覽」好悶，其實展覽開幕當日有著名特技指導羅禮賢及多位電影人，連同電影專業培訓計劃的學生即場示範電影拍攝過程，絕無冷場。示範內容是九七年一部賀歲片的拷貝被搶劫一事，又有槍戰，又有汽車特技，又有動作場面，都咪話唔精采，更引來很多途人圍觀，夠晒墟冚。

■街上示範拍電影，大人細路都睇到入晒神。

■很多香港舊面貌已不復存在，只能從粵語片的劇照尋回昔日的香港。

■展覽館內播放陳嘉上、許鞍華、奚仲文等製作人的訪問，訴說製作過程的苦與樂。

■電影資料館有「動．感．現場」特刊，從很多製片人、美指、攝影師和導演眼中，揭開拍攝現場及特技真面目。$125

做番場好戲

雖然即場拍攝電影的示範已在上周末開幕日結束，但展覽廳內有多個香港電影經常出現的場景，一直會展覽至六月初，慢慢抽時間睇都唔遲。展覽館不算大，場景也不是完全真實，如《廟街十二少》、《新不了情》的廟街，《無間道》的差館，只用木板搭建，但都幾逼真。其中廟街有唐樓的樓梯口之餘，重搭埋二樓，有《新不了情》的劉青雲吹色士風，樓下重有位鳳姐㖭，講緊嘅當然係紙板公仔啦，而參觀者亦都唔可以走上樓㗎。
齋睇無癮？咁又唔使愁，建議大家不妨搵班朋友，自度橋段，利用展覽場的布景板自製一場屬於你嘅好戲，成班friend一齊擔正做主角！

■唐樓樓梯口有紙板鳳姐！

劉華烈火戰車必睇

一個展覽當然少不了展板，介紹吓點解《烈火戰車》和《無間道》某些場景要上天台拍；當年拍警署戲，會選那些警署來拍，後期的就在辦公室或住家房間，放一張英女皇的相片來拍。重有，粵語片時代的場景很多都已成過去，惟有從劇照中緬懷。要數全場最矚目的，絕對是《烈火戰車》中劉德華駕駛的電單車，無論係咪fans都一定要撐！