黎小田同關菊英八二年結婚，八五年就離婚收場，呢對過氣夫妻前晚喺無綫將軍澳電視廣播城演出節目《超級靚聲演鬥廳》，小田見到keep得好fit嘅前妻，即刻嗒晒糖，馮仁昭見佢多次開口約人，不過關菊英就好冷淡，猛請食檸檬，令佢好冇癮。
主動拖伍衞國
小田喺開騷前專登喺女廁外面等關菊英一齊影張相，點知女方出嚟眼尾都冇望過佢，最後由記者撮合，關菊英至被迫就範，不過就周身唔聚財，一見到伍衞國，即刻叫埋佢一齊影。
小田演出前重同伍衞國講：「一陣你哋合唱《兩忘煙水裏》時唔好拖手。」不過關菊英就好少理，唱到興起主動拖伍衞國，馮仁昭覺得佢好似有心激前夫噃！
關菊英話好耐冇同黎小田聯絡，呢次合作亦唔尷尬，佢話：「大家再見亦是朋友。」至於小田話：「柳影紅之前叫我約埋佢（關菊英）食飯，佢唔蘇我，我打咗兩次電話畀佢，都推咗，我面皮都好薄。」小田否認自己花弗，只係多情咋。
