餐廳羅收到三藩市朋友電話，講及一間好有歷史，大導演、影星奇連伊士活還是小孩子，就跟住老竇去嘅老牌意大利餐館GoldSpike宣布結業，轟動三藩市，成為市民談話焦點，報紙電視台連續報道咗一個星期，情況比香港嘅泰昌餅家逼遷嘅新聞還要轟動。
餐廳羅喺三藩市有好多朋友，每次去三藩市，都在GoldSpike聚會，據餐廳羅講，呢間餐廳位於ColumbusAve（哥倫布大道），離開唐人街（都板街）只有兩三條街，位於熱鬧區位，創辦於一九二○年，現在由第三代，年近六十嘅PaulMechetti經營，一向生意十分好，奇連伊士活係常客，早已成為三藩市市民嘅集體記憶一部份。點解要關門呢？原來係香港風吹到。我哋香港人見怪不怪，三藩市人就認為係謀殺歷史。餐廳R得悉，自大地震後，不少古老建築物要加強鞏固，翻新費與裝修費不在少數，大業主自然要長期租戶分攤。翻新之後，GoldSpike以為可以照常營業，點知業主要加租，加幅甚巨，GoldSpike老闆認為難以負擔，宣布唔玩。呢啲加租趕客之事，香港人聽得多啦，冇乜稀奇。餐廳羅話：「三藩市老友記講，古老大廈業主係一位香港女士，叫做HelenTam，你識咁多人，知唔知道佢係邊位？」唔識噃！Tam可能係姓譚，Helen呢個英文名好常見，中環可能有百幾個HelenTam，點知係邊位有錢人家？既然係香港業主，用番香港業主嘅加租招數，好平常啫，乜美國佬未見過咩？點解咁嘈。
餐廳羅感歎GoldSpike唔識香港作風，開業八十六年，三代人都唔識買番間舖，做乜鬼？持有一間餐廳舖頭八十六年，淨係升值都夠食幾世啦！你睇吓「泉章居」，就明白。此乃國情不同，意大利人在三藩市經營餐廳，專注於本業，買舖頭嘅意念，從不浮上心頭，藝術家心態可以維持八十六年，已經算佢哋本事。