唔少零售業都話，今年新春生意比舊年好，過完年即刻有大手租務，聽聞，潘廸生以每月二十六萬，預租藝視眼鏡租緊嘅銅鑼灣波斯富街六十三號地舖，租金上升六成幾。
名牌潘睇中嘅舖得八百五十呎，兆安地產李太揸咗二十年，舊年以六千二百八十萬賣咗，新買家𠵱家搵到個豪客，回報先去番五厘合理水平。
個舖會由廸生珠寶經營，呎租三百，其實話貴唔貴，事關嗰度係由羅素街時代廣場轉出軒尼詩道其中一個必經之處，人流唔嘢少，年尾興利中心要拆，利園山道沙塵滾滾，就重多啲人行去波斯富街，到時再旺啲都未定。
舖市買賣都唔少，好似舖王鄧成波，啱啱出六千四百八十萬，接手尖沙嘴柯士甸道一○八號成幢商廈，地舖係燒臘舖。波叔較早時又用成億銀買銅鑼灣邊寧頓街一幢商廈，似乎十分睇好個市。
不過，波叔話𠵱家賣嘢都唔係咁易，市傳話，佢揸住嘅旺角新天地商場舊址，有人出三億洽購，波叔話重未賣。
中原游家成報料話，中環街市對面德輔道中一一五號地舖連閣樓，各千五呎，以三千五百萬賣出，𠵱家古董店月租十一萬八，回報四厘，估計出年二月約滿，可以加到十五萬，回報五厘。
電郵地址：[email protected]