個唱銷情差　任影狂谷飛
馮仁昭四圍超：「專業」關淑怡又遲到

關淑怡之前因為俾人話佢又玩情緒，演唱會在即都唔綵排，之後嬲到開記者會澄清，仲話十年嚟俾傳媒狂屈，話自己係好專業嘅藝人，後來仲不時叫記者去影佢綵排情況。
不過講歸講，馮仁昭奉勸關淑怡一句，要做專業，守時都好重要，前日關淑怡約咗大家五點半去九龍灣展貿中心採訪佢綵排情況，都遲咗成二十五分鐘先到，佢嘅解釋係去咗試衫，只見關淑怡戴住口罩，佢話患上輕微感冒，唔想進一步感染病菌。

努力增肥

關淑怡話之前去咗度身訂製服裝，搞咗將近成粒鐘，要喺身上倒模，做件軟膠質料嘅上衣，好似蝙蝠俠衫嗰種，貼身之餘仲要有彈性，製作過程好複雜。關淑怡又話會增肥，佢話：「醫生要我食多啲澱粉質增肥，近期已經肥咗三、四磅。」問會唔會畀個仔捧場？關淑怡謂：「嚟都唔話你聽，不過都唔係秘密，都俾人影過。」關淑怡個唱嚟緊星期四連開三場，搵咗草蜢、陳奕迅同黃耀明做嘉賓，但到噚日為止除咗尾場一百蚊飛爆咗外，其餘都未爆。