六叔年事日高，TVB嘅去向特別令人關心，早前佢哋引入殼王做收費電視股東，頭一單新鮮事，竟然係佢哋有可能「唔玩」收費電視。
近期不斷有消息傳出，TVB旗下嘅收費電視台－－新電視將會同電盈嘅Now寬頻電視合作，前者利用Now嘅寬頻網絡殺入各大小屋苑，後者則可多一個本地節目供應來源，小小超加六嬸，聯手同吳老闆嘅有線片過。
但係將新電視放上去Now播，你估啲人日後又會唔會繼續畀錢睇新電視呢？咁做法無異於自殺，大家都想知佢哋點諗。上個星期四，本來TVB喺佢哋一廠舉行記者會，講收費電視未來發展，但嗰朝突然話總經理陳志雲病咗，臨時要取消記者會。之不過，星期五有探子回報，見到TVB副董事總經理陳禎祥喺鰂魚涌電盈大本營出現。
陳禎祥原本喺TVB出身，後嚟轉投小小超，當年盈科數碼動力（尚未同香港電訊合併）搞網上虛擬電視Now，正正係佢負責，之後又回頭入番TVB，咁嘅背景，你估佢現身電盈係咪探吓舊同事咁簡單？
聽聞兩間公司仍然商討緊合作細則，總之萬事俱備，希望可趕及最快今日召開記者會宣布詳情。六叔想收山，小小超則銳意大搞傳媒王國，戰國時代就快揭幕。
李華華