上星期同班AO朋友食遲來嘅開年飯，冇法子，個個平均一星期食3晚春茗，叫食飯大家都提唔起勁。難得聚頭，自不然又八卦一番。進士喺本欄一般寫AO或者政府嘢居多，難得今次聽到啲同政客有關嘅嘢，應該同讀者分享吓。
第一單係關於近來忙於搞廁所會嘅落選立會議員勞永樂醫生，進士來自東區嘅消息係原來勞醫生係政改方案嘅大輸家。點解咁講，原來勞醫生之前見區議會喺新政改方案下有望增加在立法會的議席，可能勞醫生覺得經區議員間選入立法會比再鬥郭家麒成功機會更高，所以，據聞勞醫生曾積極聯絡親中政黨，打探以「獨立」身份出戰太古城選區。勞醫生其實都好識走位，因為太古集團出名管理嚴。太古城內一概不批准政治活動，喺嗰度選即係連助選都慳番。煲呔個政改方案過唔到，勞醫生選太古城就自然不了了之。
黃英琦左中右三面擺
另一單則同灣仔區議會主席黃英琦有關，話說黃主席同前民主女神余若薇及何秀蘭甚為老友。大狀組黨有傳媒行家估佢有望受邀加入。席間AO們對此傳聞不以為然。不過，來自灣仔嘅消息可以參考。黃英琦自己以及家族同中央關係好係人都知，此所以03年區選就冇親中人士落佢嗰區搞局，但黃主席亦有啲計仔，搵咗班由何秀蘭拉線嘅「公民起動」全線追擊區內親中人士，結果成功打敗咗好幾個區內親中台柱，最後重同民主黨合作攞咗區議會嘅正、副主席。因為呢單嘢令好多親中人士怨聲載道。上屆立會選舉，佢老公周德熙又幫范太做選舉經理，左、中、右兩公婆玩晒！
進士覺得黃主席都係一個人才，印象最深係佢因為自由黨唔支持直選而退黨，呢種情操原本好值得支持，可惜計算得太多，泛民爭雙普選佢又唔表態支持，我睇大狀黨收佢會幾醜怪。
最後講吓中西區，民主黨區議員梁耀祖律師過年前交通意外重傷，生死未卜之時有啲人幾涼薄，前港進聯中西區委任議員林乾禮就「拿拿聲」搵個律師入梁選區掛街板。唉！慰問都冇就已經諗補選！
倔頭進士
傳真︰2623-9278
電郵︰[email protected]