亞洲商業銀行出售，馬來西亞大眾銀行以四十五億元高價買入，唔怪得話潮州人係「自己友」，潮州老闆坐埋，特別容易傾。
出價咁高，各有算盤，大眾銀行在港擁有上市公司JCG（六二六）嘅64%股權，利用JCG買埋亞洲商業銀行，六二六已經改名為「大眾財務」，以後亞洲商業銀行改名為「大眾銀行」或「大眾商業銀行」，幾有宣傳性作用，而且大眾財務（即JCG）在港近三十年，素以日本sarakin模式經營私人貸款業務，獲利率高過銀行好多，收購之後，利用銀行吸納存款，大眾財務借出私人貸款，雙方之協同關係，大約與滙豐收購美國HouseholdInternational相似。正因為咁，大眾銀行先至肯出咁高價，市賬率（price-to-bookratio）去到兩倍半。如果係銀行收購銀行，一定唔會出手如此闊綽。
亞洲金融集團點解肯賣呢？據一啲賓架講，係第三代嘅意思，因為亞洲商業銀行規模細，市場競爭力唔多夠，長做落去，好難有突破，不如套現，改投回報率更高嘅保險與醫療生意。潮州陳家第一代創辦盤谷銀行，喺泰國呼風喚雨，第二代長子陳有慶在港創辦亞洲金融集團，佢位二公子陳智思（第三代）活躍政壇、保險界，睇到前景喺邊度，第二代話明買家肯出市賬率兩倍或以上，先至肯割愛，既然有潮州鄭家（大眾銀行）願意畀足兩倍半，梗係一拍即合啦。
陳家在曼谷開辦一間Bumrungrad醫院，生意興隆，每年有十萬人以上入住，主要係檢查身體。呢間醫院已發展成醫療集團，向東南亞及中國進軍，香港人遊曼谷，一定去過素坤逸路嘅Emporium，呢間大廈附設酒店，就係陳家名下嘅。賣銀行，得現金四十五億元，好好使，有大把投資機會，勝過做銀行搶按揭生意。