擁有近卅萬會員嘅工聯會，今年四月就會舉行第卅三屆會員代表大會兼領導層改選。工聯會理事長黃國健（KK）噚日喺新春團拜活動上被問到有冇人會挑戰棠哥時，竟然笑笑口話，「應該無人敢，佢（鄭）如日方中喎。」
畀頂高帽照頭笠嘅棠哥聽到，梗係好尷尬，所以只係話「有人選（我）咪選囉，無人選咪係咁先囉」，一於表現得唔太在乎，唔通呢招叫做以退為進？據八方所知，棠哥同KK喺工聯會咁德高望重，睇怕都無人會越級挑戰，所以工聯會個班底一定無乜大變動，未來都係佢哋做揸fit人。
棠哥同KK喺改選之前，重會走訪所有屬會，聽吓佢哋對工聯會發展有乜意見。不過，佢哋話此行同組黨無關，但承認積極部署區議會選舉，希望○七年可以派出二十至三十個人出戰。如果成功搶灘，咁就真係組黨有望喇！
身為人大嘅KK，近來重有一個煩惱，就係呢個星期五嘅安排。除咗煲呔約佢哋班人大政協上禮賓府傾嘢，深圳市政府都搵咗一班政界人士會面，講吓兩會相關香港議題，實行同煲呔搶客。KK就好畀面煲呔，話嗰日會去禮賓府，但預料都唔會多嘢傾，當係吹吹水咁咋噃。
傳真︰2623-9278
電郵︰[email protected]