紐約期油去年11月尾低位58美元，12月尾低位59.10元，上周三低位59.20美元。3次低位向上移，圖表佬入市買，上周五連續第2日上升，收61.29美元。油價由本月初69.78美元調整落嚟，幅度已經足夠，估計技術反彈繼續，炒石油C輪，有得諗。
中石油C輪2148：揀中石油C輪埋手，2148諗得過，7月下旬夠鐘，輪價1.15元，溢價2.4%，槓桿率6.4倍（有效4.9倍），引伸波幅32.6%。呢隻唔係最熱門貨色，4508交投旺得多，但溢價亦高好多，成日望住報價機做即市炒賣，4508亦可以諗諗。
隻輪7月中到期，溢價10.3%，槓桿率13.9倍（有效6.7倍），引伸波幅34.5%。
中海油C輪9266：中海油C輪有幾隻交投唔錯，但溢價去到12%甚至16%，槓桿率又襯唔起，咪手多。9266比較啱睇，6月尾到期，輪價65仙，溢價5.6%，槓桿率9.7倍（有效6.3倍），引伸波幅31.3%。
中石化C輪2206：中石化C輪搵隻嚟炒，2206最掂最睇得上眼，6月尾到期，輪價75仙，溢價3.2%，槓桿率6.3倍（有效4.7倍），引伸波幅38.6%。另外隻4521亦可用作炒即市，槓桿率大啲，爆炸力大啲，當然要畀高啲溢價。
章盛