雜誌影到黎天王拖女豪歎「原澗」爐端燒，埋單差唔多六千蚊，佢哋係大明星，坐Privateroom好理所當然！我哋呢？歎得爐端燒就記得霸吧枱位，既可欣賞師傅手藝睇火熊熊Liveshow，又可即時聞到香噴噴燒物味道，最抵死係師傅會仿效傳統日本漁民，將煮好嘅食物放喺3呎長木槳上，然後以日文大叫食物日文名稱再隊埋你身，風味一流呀。
記者：盧家蕙 攝影：伍慶泉
模特兒：AllfromSalvador
解構爐端燒
傳統日本爐端燒（ROBATAHARAKAN），「端」就是「邊」的意思，是昔日日本漁民農戶的古樸飲食文化，將新鮮的原食物材料呈放在客人前，並即席在火爐旁烹調，特色是純以鹽和胡椒調味，讓食客品嘗食物本身的味道。
木槳遞餸
點解用木槳遞餸？有古講，榮師傅就話：「以前日本皇帝出巡到訪唔少民間小店，爐端燒係其中之一，皇帝咁紆尊降貴，平民百姓望都唔敢，何況直接接觸呢？所以就以木槳遞上食物喇。」另一說法是傳統爐端燒只屬小店，由漁民經營為主，店員不多，把食物放在漁民用的木槳上傳送畀客人，充滿風味又節省時間。
爐分兩層
入行10年的榮師傅笑說：「我都唔知幾耐無燒過嘢食喇。」日對夜對重唔夠咩，見他左翻右撥手法純熟，話咁快又燒好一碟。「呢個爐由日本訂製，溫度高達攝氏600度，明火設計，比起電爐，食物會更加香口夠火氣。」傳統火爐分兩層，上層串燒肉類及魚，下層網燒番薯、茄子，因為火力有別，比較易抽乾水分的食物，好似菠菜咁，就要用錫紙包住放在下層；上層的食物如牛肉，講求外脆內軟，加上油份逐少滴下，燒完唔會食到成口油。
早啲霸吧枱位
「原澗」12月重開後行三合一經營概念，分清酒吧、壽司吧及傳統日式爐端燒，全店改裝後東瀛味道濃厚，暗色調的裝潢流露粗獷古樸感覺，一派鄉村風味，讓人聯想到日本古時農戶漁民一家人圍住爐邊，燒烤自家新鮮收成的農作物魚穫。
餐牌上有50多種紅、白肉、蔬菜等燒物，話晒高消費地方，天王都食咗六千蚊啦，咁矜貴，皆因一分錢一分貨，大部份材料如喜之次魚、依佐木魚、鱈場蟹等皆由北海道、青森、築地魚市場等地空運到港；蔬菜大部份是日本有機貨，如份外鮮嫩的日本菠菜、甜如蜜的日本番薯等，總算值回票價。
a.燒鮑魚仔每隻$80
加拿大鮮活鮑魚仔直接鐵板燒，再淋上秘製燒汁即成。由於用料新鮮，只要火候控制得宜，味道已經很鮮美，腍而不韌。
b.喜之次一夜干時價約$300
「喜之次」是北海道獨有的魚，眼大大，因此又有日本矜貴大眼雞之稱，怕你睇到佢眼突突恐怖的死狀，師傅已將佢斬首，即使雪凍咗，肉質都唔覺粗糙，外面香脆，內裏仍然Juicy。
c.立體和牛串2串$200
選用A5級和牛肉眼扒的中心位置，𠝹出積木般的Size，得出粒粒長闊高都係1吋的立體和牛串，油花分布平均，入口脂香滿布，鮮嫩口感爆燈，每粒$50，好矜貴。
d.燒年糕每客$35
因為日本漫畫愛上燒年糕，特意叫師傅示範點樣將一嚿硬繃繃嘅「擦膠」，燒至黏黏軟軟的年糕。脹鼓鼓的它沒啥味道，塗點醬汁包住紫菜，熱乎乎都幾得意。
e.甜番薯$40
外層微焦內裏軟綿綿，番薯的香味飄散於空氣之中，甜味則比一般濃郁，非常滋味，果然簡單就是美。
f.蟹肉海膽釜飯$150
選用比秋田小町米還貴的岩手縣純情米，每10公斤賣$1,500，是日本每年第一造的稻米。澆入清酒、味醂等調味，米顯得格外清香，配時令花蟹及加拿大海膽，毋須醬汁也鮮味四溢。
原澗––ROBATAKAHARAKAN傳統爐端燒（28828616）
地址：銅鑼灣新寧道新寧大廈1樓
營業時間：星期日至四12:00nn-3:00pm，6:00pm-11:30pm；星期五及六12:00nn-3:00pm，6:00pm-12:00mn