每當市場有新消息，代理都把握機會，游說買賣雙方加快交易。屯門澤豐花園近日連續有三宗買賣，代理話，與銀行按揭戰有關，重話對細價樓零舍有利。
澤豐花園嘅三宗交投，全部都喺第二座，高層L室六百四十三呎，成交價八十九萬二；高層F室，四百八十二呎，作價六十七萬；低層五百一十五呎B室，賣七十萬。
中原葉瑋珩話，細價樓買家，對息口特別敏感，所以銀行減息戰，會刺激呢類單位買賣。
中原麥成輝話，青衣區租客，見銀行爆發減息戰，全期可以有最優惠利率減兩厘七五，嗱嗱聲拍板，用四百八十萬，買入青衣盈翠半島十一座高層F，九百八十八呎單位自住，等約滿後就有自己居所，唔使捱貴租。
另外，中原鄭莉莉話，外籍客因為銀行減樓按息率，睇完兩次樓，決定用一百八十八萬，購入灣仔順利大廈七百呎，連六百呎天台單位。呢位外籍客，嚟咗香港做嘢四年，計劃長住，早前已有意買樓，受銀行減按揭息率刺激，所以加快置業。
銀行一話減樓按息率，人人都爭住買樓，係咪咁好世界，蘭西有少少保留。
電郵地址：[email protected]