賭王何鴻燊（圖）噚日出席香港各界婦女聯合會嘅春茗，為咗應節，賭王自告奮勇，叫大會畀十分鐘時間佢棟篤笑講狗，不過講講吓狗，無端端就變咗講女人，賭王仲講到眉飛色舞。賭王話，香港聲色犬馬好多誘惑，但啲男人狗年記住唔好去滾咁多，分分鐘滾到件「狗皮膏」，黐得唔甩得，到時搞到一身蟻，最好請啲女人食多啲天九翅，如果唔係就「狗瘦主人羞」！
有四個老婆嘅賭王生性風流，佢話每逢新年就會有好多太太同小姐圍住佢，問吓佢「狗年好唔好嫁娶？」「狗年生仔定生女好？」咁梗係生狗仔好啦！「生個女好似老虎狗、污嘴狗，咁就好難出手；但生件靚狗女，卻又鎖鏈都鎖唔住！生狗仔就好好，狗仔一定忠心，燈柱一遞腳又容易！」八方聽罷都戥啲女人心嬲，一向說話得體嘅賭王，點解會講啲咁嘢。
醒男士追女仔秘笈
賭王仲教啲男仔喺狗年點追女仔，最重要係執正啲，好似哈巴狗咁笑，唔好好似烚熟狗頭咁，追女仔要闊綽啲，唔好孤寒，唔好送埋啲狗屎垃圾，最好就送九卡鑽石同四條九嘅金飾，咁就差唔多！女仔就唔好擺款，十問九唔應，食嘢就唔好餓狗搶屎咁，唔好狗眼看人低，人唔好咁容易表露感情，裝吓假狗就啱啦！賭王說罷，八方隨即得出結論就係，難道賭王認為男女嘅戀愛只係建基喺物質同埋金錢之上。
唔知賭王用咗幾多時間度呢篇演講，差唔多句句都有個狗字，雖然講得咁好笑，但畢竟台下大部份都係女人，賭王窒啲女人「狗瘦主人羞」，又話生仔好過生女，啲女人梗係唔理佢，個個喺台下照舊食嘢講嘢話之你。搞到搞手之一嘅蔣麗莉，都忍唔住搶咪叫大家靜啲，唔好「三個女人一個墟」！
講到談婚論嫁，賭王就建議啲狗仔記住唔好娶鼠女，如果唔係就變咗鼠竊狗偷，總之最好就係好似唐媽媽教唐英年咁，有分有寸、年年有餘、多啲減稅、多啲加人工啦！
賭王本身有四個老婆已經唔啱，仲要喺咁多女性嘅場合，咁樣搵啲女人嚟講笑話，呢鋪真係唔畀面。好似婦女事務委員會主席高靜芝咁，都忍唔住孖叉賭王欠缺兩性平權意識，真係應該同佢再教育一下，但賭王捐咁多錢又做善事，都好難話唔請佢嚟嘅。
傳真︰2623-9278
電郵︰[email protected]