迪士尼大大話話都開咗五個月，新聞一直多籮籮，最近八方收到一位讀者訴苦，話迪士尼真係好唔識做，佢喺網上見到呢個星期三，即係二月廿二號樂園開放時間比平日多咗一個鐘頭，夜晚九點先閂門，所以佢咪買定啲喺半年都有效嘅飛同啲朋友玩番日，點知佢最近打去迪士尼熱線先發現，原來嗰日畀人包咗場（其實八方早排都提過，嗰日利豐集團訂咗好多好多飛送畀員工玩，慶祝集團百周年紀念），迪士尼啲職員重話，嗰日諗都唔使諗，幾早到嚟排隊，都唔會入到場。
呢位讀者就好㷫，覺得既然廿二號無得入場，迪士尼好應該早啲發出通告，佢就話打個電話問吓啫，如果唔係就浪費咗幾十蚊車錢之餘，重浪費咗一日時間。
八方都好同意呢位讀者意見，既然當日迪士尼一早畀人包咗場，唔可以再畀其他客人玩嘅話，咪早啲出聲囉，否則到時啲客歡歡喜喜嚟到先發覺無得入場，咪又搞到啲人怨聲載道。
傳真︰2623-9278
電郵︰[email protected]