噚日公仔箱報道大陸民工荒，話人工三年翻一番，終於工人捱出頭，可喜也。利世民有不少朋友在大陸開廠，全部可以證實民工荒非常嚴重。利世民居安思危，就嘗試苦思呢個問題，結果係︰「情況一啲都唔樂觀」。
最膚淺嘅解釋，就會話因為中國勞動力平，成為世界工廠，當全世界都向中國入貨，結果令到勞動力供不應求。點解利世民話呢個解釋膚淺呢？因為如果講到人工平，中國其實已經唔再係亞洲人工最平嘅地方。事實上，亦有唔少廠家開始將生產外移到東南亞其他國家。
幾年嚟其實除咗民工荒之外，其實重有電荒、水荒、原材料荒。如果大家心水清，就會記得最新一輪打擊房產泡沫嘅宏觀調控，當時國家限制資金流向房地產，結果就流入工業。
宏觀調控 治標不治本
工業嘅資金氾濫，造成經濟上嘅「過度活躍症」。經濟「過度活躍症」下，人工同原材料全部大幅漲價，相反成品嘅價錢就有如瀑布一樣大瀉。利世民大膽預言，呢個局面嘅反效果將會帶來前所未見嘅衝擊，各位如果有沾手國內工業類投資嘅朋友千萬要小心。2010年世界工廠會唔會係中國，利世民話機會最多五十五十。
九十年代大陸嘅宏觀調控只得一招，就係一刀切收縮借貸，結果所有行業都一沉百踩。結果到咗2000年之後，宏觀調控變成行業式嘅調控，好多人以為係好嘢，但只不過係將一個泡沫取代另一個泡沫。其實大陸最終極嘅問題係銀行借錢不問風險回報，一日呢個問題唔解決，泡沫只會一個又一個，宏觀調控始終唔係長治久安嘅辦法。
樂觀啲睇大陸嘅情況，工人收入提升如果可以快快令到服務業嘅發展落地生根，結果個餅可以愈來愈大，話唔定可以避過呢一劫。年初大陸政府重估國民產值，話低估咗服務業嘅增長，希望呢個係鬼子佬個句︰Toeverycloudthereisasliverlining。
利世民