每年一度以體驗飢餓為主題嘅大型慈善籌款活動「饑饉三十」，今年已經定咗喺四月二十二至二十三日，響香港仔運動場舉行。今年活動嘅主題係「永不遺忘飢餓世界」，大會噚日就喺青衣城辦咗一個揭幕禮，等幾位過去參加過活動嘅營友，分享吓經驗同作出呼籲。
其中一位已經參加咗活動十三年嘅營友岑燕華（左二），佢噚日同八方講，當年第一次參加活動，係志在去捧自己偶像Beyond樂隊嘅場，估唔到喺活動期間體會到落後國家人民挨飢抵餓嘅滋味，故往後每年參與活動之餘，佢亦都參與咗助養非洲兒童。
至於今年活動最年輕嘅參加者，相信非年僅五歲嘅張柏謙（右）莫屬。謙謙話上年係媽咪（右二）帶佢參加活動，今年一樣會全家出動參與，佢話上年捱過肚餓後，學曉唔會亂咁浪費食物同揀飲擇食。
傳真︰2623-9278
電郵︰[email protected]