澳門樓市喺賭業帶動下係咁升，吸引大量外資流入，但對港人嚟講，究竟升成點，未必好清楚。原來舊年最好係氹仔舊城及馬場區，足足升咗八成半，贏晒其他區，呎價八百九十澳門元（下同）。
澳門半島林茂塘區升六成八，排第二，呎價一千零八十三；貴價住宅區氹仔海洋及小潭山地段，升六成半，呎價近千七，居季軍。至於係舊區同環境冇咁好嘅黑沙環，升近一半，每呎六百蚊。
舊年澳門樓價升到第三季高位後全線回落，利嘉閣澳門董事王俊琳話，全年升近一成八，由○三年首季谷底至今，樓價升六成半，就算舊年第四季調整，都係短暫性，長遠走勢仍然向好。
王俊琳估計，今年樓價升一成半至兩成，睇落好過香港。佢咁睇好，因係澳門經濟重係向上，居民收入增加，對住屋需求日大，加埋外勞都要搵樓住，有乜法子唔好世界呢？