薛凱琪（Fiona）被喻為樂壇冰山美人，雖然不少少男想把冰山劈開，但要攝位埋身甚有難度。其實Fiona對男孩拒諸千里，全因怕醜所致，敢想不敢做，情場上只能隔岸觀火等運到，即使緣份降臨，慢幾拍的她要等到腦海忽然一叮，才驚覺愛神駕到。
愛情篇：冰山美人Cool爆
天生一張親切臉孔的薛凱琪，不單擁有藝人千金難求的觀眾緣，而且迷死很多圈內外少男，順利成為新進少男殺手，但工作以外，她對男藝人吝嗇笑顏，很多時候，她都是不望人的，cool到爆，有歌手背後稱呼她是冰山美人，感覺太冷了。
這位冰山美人聞言先嘻嘻哈哈大笑起來，笑飽後才說：「如果我認定同邊個男仔拍拖就一啲都唔冰山，暫時未有對象，身為一個女仔，有少少嘢係要保護自己，唔通個個都撲埋去試吓啱唔啱咩？
「我唔覺自己眼角高，係想搵夾、有feel嘅好人，香港地好難搵真心好人，到𠵱家都未有。對男仔，我承認係有少少冰，係怕醜，唔可以即刻同人混熟，對男仔冰山啲，但又鍾意同男仔玩，佢哋豪氣啲，所以我好多同志男仔朋友，十個男仔friend有八個都係同志。」
「四年冇拍拖」
不過，一直有傳拜倒Fiona石榴裙下者眾，她卻說：「有都唔好攞嚟講，又冇拍到拖。事實又真係冇乜人追，拍拖要搵個鍾意，唔係都唔使四年冇拍拖啦，有時係會諗，但唔會有行動，我對一個男仔要觀察好耐，啲朋友咪笑我囉，話『等你觀察完，人哋都追咗二十個女仔啦』，畀少少時間睇吓都唔得嘅話，唔慌好嘢啦！」
正如Fiona自我形容冰冰地，她築的圍牆可能過厚、冰可能太多，想搵個朋友都幾難，「可能得我一粒女，個人幾極端，唔識同人溝通，唔代表我唔nice！冰山，盡量溶啦，希望啲人用自己嘅打火機慢慢溶，會試吓主動啲。我見到男仔好驚㗎，好怕同男仔有眼神接觸，我冇乜直嘅男仔朋友，但又南同祖名唔係攣。」
Fiona曾先後與同屬華納的組合Shine成員黃又南、陳冠希（Edison）和新人方大同傳緋聞，細訴這三個男人時，她的心情、表現都是不一樣的。說又南，Fiona有點無奈，語帶感觸：「同又南好少聯絡啦，驚俾人寫呀，都會唔開心，我唔係為咗同佢聯絡唔到唔開心，係因為同異性朋友出街被人影到，少咗聯絡，咪局限識啲女仔friend，但又話你lesbian（女同性戀）啦。
「茫茫人海，佢（又南）算係圈裏傾到偈嘅知己，搵知己唔會諗有冇發展機會，我哋係出街食吓嘢唔好彩被人影到，未發展到傾心事就被人影啦，嚇驚我㗎，好似怕醜草咁，被人掂一掂就縮。」
說Edison，Fiona三扒兩撥講完，一派呼寃feel：「我連佢電話都冇！唔講啦，都解釋唔到，但佢都可憐，點樣都被人傳。」
慢熱着重觀察
最後，談小師弟方大同，Fiona說得最詳盡，更講到明好喜歡，發展機會也保留，可能比她小三歲的方大同才是爆冷偷心人，「呢個係我覺得最開心嘅一單，好處係誠信力低，新人見報好難，有段緋聞戥佢開心啦，佢應該裱起段報道。
「接受細個我嘅男仔……都可以嘅……差三年OK嘅，但我feel到佢思想似個細路仔，唔係嗌honey，嗌你姐姐囉，應該唔會啦，plus冇嘢冇可能，我睇人熬好耐，反應好慢，可能做咗一年friend至『叮』，原來我鍾意佢喎。」
