四十四歲的陳可辛，一半人生在電影行業度過，亦被喻為最懂巿場策略的導演，其執導的《如果．愛》獲得金像獎十一項提名成為大贏家，陳可辛稱自己水準穩定是因為將勤補拙，不停反思，並說：「我養老婆仔女都係靠電影，所以每拍一套戲都要諗清楚。」以下是陳可辛親述自己與電影的點點滴滴，以及他的愛與堅持。
如果畀我揀，金像獎最佳導演我會揀《殺破狼》嘅葉偉信，我好鍾意呢套戲，金城武最佳男主角，但佢兩個都冇入圍，最佳電影我揀《頭文字D》，當日睇完戲好興奮，即刻打畀劉偉強，我覺得佢拍得好過《無間道》，每個電影人都有一個世界，但《頭》佢突破咗自己，要中國人演日本人係一件幾難嘅事，但佢拍得年輕有活力，而且好他條咁表達出嚟。
「《黑社會》非好作品」
或者《黑社會》更加似會攞最佳電影，但呢套戲我唔係好鍾意，以杜琪峰嘅作品嚟講，我覺得甚至唔可以歸類為好嘅作品，後半段拍得有啲亂，中間梁家輝嘅轉變，好明顯係想令觀眾覺得意外同估唔到，有啲牽強。
我記得拍完《如果．愛》，同周迅一齊睇帶，睇完我哋一齊話『金城武做得好』，我覺得呢套戲入面，周迅同我只係合格，金城武先係點睛之作，但金像獎十一項提名，偏偏金城武冇。向來拍男人失戀傷痛嘅戲比較少，觀眾可能唔習慣。
喺機場返轉頭攬住周迅喊嗰場，係金城武自己自然咁喊出嚟，我冇叫佢喊，雖然失戀咗十年，但失戀亦係一種戀愛，佢未離開過呢段感情。金城武喊完之後，我突然諗到，佢喊係因為報復之後，佢連恨嘅機會都冇埋，佢哋真正完咗，所以好慌。我將我嘅想法話畀金城武聽，佢話：「你諗多咗啫，我純粹係突然想喊。」
「中型製作好難捱」
隨住時間唔同，我想拍一啲陰暗面重嘅角色，周迅嘅角色本來好壞，佢做得善咗，相信有好多票房，都係周迅爭取返嚟，但得到觀眾同情同演技嘅層次係兩回事，不過以票房嚟睇，係佢啱我錯。一套戲嘅好壞唔係淨係睇票房，但我都唔想拍完套戲，得三、五個人話好睇，其他人睇唔明，咁就冇癮。
今年電影巿道好慘，都幾得人驚，嚟緊千幾二千萬嘅製作可能冇哂，一係拍超級大片，但拍得嘅只係得嗰五、六個人，一係拍三百萬低成本電影博一博，加上香港嘅video巿場比兩年前跌咗三分一，真係好難捱。但我會堅持拍中型製作，希望今年可以開五套左右。
「未有最滿意作品」
我養老婆仔女都係靠電影，自己搞公司好辛苦，製作、發行、宣傳乜都要做，我都想低調淨係做導演，做生意係迫不得已，打工嘅話，香港大公司數埋得嗰兩三間，如果反咗面就冇得做，起碼我𠵱家有得選擇，唔使俾人迫埋牆，你話我拍嘅電影水準比較穩定，係因為我想一直做導演做落去，所以每拍一套戲都要諗清楚，我將勤補拙，不停反思，咁樣唔會有出大錯嘅機會，但有時會令套戲冇咗神采。當一個人以為自己好叻嘅時候，可能會出現最大嘅失敗，我身邊有好多導演朋友都有咁嘅階段，覺得自己「得啦」，但其實係唔得。
我嘅作品入面，冇一套完全滿意，次次都會覺得爭啲，如果要揀嘅話，係《三更之回家》，因為古仔簡單啲，最少嘢講。
我可以話係香港情懷嘅癮君子，拍《金雞》係為咗自己happy，大陸一定上唔到，𠵱家大陸收緊合拍片條例，話要拍番真正港產片嗰班，就係之前上大陸搵錢嗰班，講真我之前斗零大陸錢都未攞過，咁耐以嚟最死守港產片嘅係我，第一部合拍片係《如果．愛》。
口述：陳可辛 撰文：張止寒 攝影：林德雄
