亞洲電視新聞部噚日俾廣管局揭發佢作新聞，話說亞記喺舊年十一月八日晚報道一單行政會議討論巴士票價可加可減機制嘅新聞，引述政府消息人士話，行會否決咗可加可減嘅機制，點知俾五個熱心嘅巿民「將軍」，向廣播事務管理局投訴亞記作新聞。
廣管局噚日開會處理投訴，認為投訴成立，向亞記發出勸喻，叫亞記要遵守業務守則，報道新聞要準確無誤。發言人話，今次嘅裁決係參考當日環境運輸及工務局發出嘅澄清新聞稿，行會議程、討論係保密嘅，亞記嘅報道係全屬揣測同冇根據。
質疑「政府消息」
廣管局就認為亞記指行會否決可加可減機制嘅報道係錯嘅。重話亞記報道提及「政府消息」，會令到一般觀眾以為該項消息係嚟自政府。
廣管局單靠環境運輸工務局一篇新聞稿，就話亞記作新聞，又話到亞記引述嘅「政府消息」，誤導巿民將馮京當馬凉，八方擔心廣管局嘅說法係咪干預新聞自由，即刻問吓亞記呢個當事人。點知亞記發言人全盤承認錯誤，接受廣管局嘅決定，但就無提作假新聞嘅人會點處理。
爆料熱線：29290000、27860099
報料傳真：26239278
報料電郵：[email protected]