二十九歲的創作歌手側田為遮掩M字額，出道以來帽不離頭，沒料到此舉反觸發傳媒對他的好奇心，派出狗仔隊日以繼夜貼身追蹤，令側田大感困擾；已有禿髮煩惱二十多年的羅家英深深體會側田苦況，但認為一切既來之則安之，家英哥建議與其長年累月遮遮掩掩，倒不如乾脆除帽以真面目示人，讓大家看個夠影個飽，免得日夜提心吊膽如此辛苦。
禿髮幾乎是羅家英的個人標記，雖然早年有些口沒遮攔的人譏笑他為「禿英」，但家英哥總闊佬懶理，一笑置之。不過，禿髮的煩惱，也不是完全沒對家英哥造成傷害，當他三十來歲在粵劇界闖出名堂之際，卻赫然發現自己由靚仔文武變成禿髮小生，或多或少對當時擁有不少戲迷的他造成打擊。究竟，家英哥發現自己開始甩頭髮時，有沒有產生恐懼感？又有沒有像側田般不敢以真面目示人？
「梗係想靚仔啲」
家英哥笑說：「咁又冇，只係覺得自己會冇咁靚仔囉！作為藝人，梗係想自己靚仔啲啦！雖然我做粵劇呢行要戴頭套演出，觀眾睇唔到我甩頭髮，但有頭髮總好過冇頭髮嘛！記得細個剪頭髮嘅時候，飛髮師傅同我講話髮腳高嘅人將來一定甩頭髮，我髮腳好高，大個咗一定甩晒啲頭髮，估唔到俾佢講中咗喎！」
那麼，家英哥當年可有採取任何方法補救？「我睇書參考，試過用柏葉浸酒，九蒸九曬，即係用柏樹嘅葉，蒸完之後再曬乾，如是者蒸九次曬九次之後，再用拔蘭地浸，然後再搽落個頭度，亦有好多人介紹我用其他方法，但一啲都冇幫助！我知道自己冇可能生得番啲頭髮出嚟，因為我爸爸都係禿髮，我呢個現象係遺傳，加上我係油性皮膚，頭油特別多，會阻塞住啲毛孔，加速甩頭髮，既然知道醫唔好，咁咪算數，由得佢甩到夠囉！」
日前一項調查報告顯示，百分之六十七的女性寧願揀肥胖男性做男朋友，也不會揀甩髮男友，家英認同脫髮男性在結交異性時有一定影響，並笑言自己當年因為甩髮而被女友甩掉，「當時我女朋友話唔介意，但唔知係咪其實好介意，所以到後來佢飛咗我呢！」
猶記得家英哥與阿姐汪明荃初初拍拖時，經常戴假髮示人，究竟他是否為了阿姐才戴假髮？「咁又唔係！我以前有個鄰居係做假髮嘅，佢成日游說我試吓，咁我咪試囉，有時我就咁上台唱戲，唔係着住戲服嗰陣咪戴番個假髮囉！不過假髮始終都好假，唔係咁好睇，織髮我又嫌麻煩，每隔幾個禮拜啲頭髮長咗幾吋，又要再花幾個鐘頭再織過，每次重要成千幾二千蚊，好唔化算！」
「天生有乜辦法」
禿髮令家英哥經常被取笑，但他不但沒耿耿於懷，反而利用這個特徵來發展笑匠路線，總算在影圈闖出名堂，「就係因為我冇乜頭髮，成龍先至喺《重案組》搵我扮王德輝，跟住愈嚟愈多電影搵我。冇錯，係有人會取笑我，但正如生得靚生得醜，天生嘅嘢又有乜法子？既來之則安之，我都有睇過側田單新聞，作為過來人，我建議佢應該盡早以真面目見人，啲人影多幾次睇多幾次之後，自自然然冇嘢講㗎啦，到時咪可以安心做好自己工作，唔使再遮遮掩掩囉！又或者剃光個頭，好似張衛健咁，一剃光之後重有運行！」
採訪：戴彩煥
攝影：林德雄
服裝：izzue
