近年，大圍出現一個索吻狂徒，入屋見人就要逐個㩒住嚟錫。奈何礙於其身份特殊，案件警察絕不受理之餘，受害者都只有認命。「佢好霸道㗎！初次見面你一定要俾佢錫啖先，唔係佢會猛咁擒上你身唔放過你，你影唔到相㗎喇！」訪問前阿賓已經告誡小記，要埋索吻狂徒Burger堆就要先付「手續費」——香吻一個。（實質豈止一個？）
OK，惡霸自有佢哋嘅溝通方式！為咗完成使命，我同攝影師認命踎低身，Burger真係成支火箭咁，遠一遠全力衝過嚟，㩒住小記個頭係咁舔。小記出力避開佢條砂紙脷嘅同時，佢突然一啖咬落小記個嘴度，重流「蚊飯」㖭！小記怒睥Burger，佢伸住條脷笑笑口好似話：「肉緊呢?!」吹脹！
記者：陳慧敏
攝影：周旭文
移民狗女玩變性
每一個罪犯背後，其實都有一個催人淚下嘅故事。5歲嘅Burger係一隻天生霸道嘅JackRussell狗女，細個嘅時候，佢住嘅係幾千呎無敵花園洋樓，園裏只得佢一隻狗，過路嘅麻雀、蜥蜴、老鼠全逃不過佢銳利嘅法眼。「JackRussell本來就好霸道，而且可能佢細細個就做咗絕育手術，身邊朋友唔係洛威拿仔就係大丹佬，Oral-B又咁弱小要佢保護，所以佢自己都好混亂，唔係好知自己係男定女。有時重會單起腳小便、發情（動物做了絕育手術，有時還是會發情）時重會擒Oral-B，好搞笑！」後來因為家庭問題移民返香港，Burger始終係隻獵犬，屋細，令佢好容易可以喺短時間內連環捉人狂咀，滿足到佢狩獵嘅喜好。漸漸，佢就成為咗一隻以索吻為樂趣嘅「變態」狗女。
唱歌狗義氣掛心口
JackRussell本來就係好聰明嘅狗種，教乜識乜，有時更加唔教都識。好多荷李活大片好似《變相怪傑》同其他廣告都鍾意搵佢嚟擔番個角色，係電影界賺錢最多嘅狗。據犯人親屬嘅口供，Burger聰明得嚟重會對「嘟……嘟……」嘅電話鈴聲有着強烈嘅熱誠，阿賓：「電話響佢會同個電話鬥長氣，又鍾意同媽媽吹嘅牧童笛Jam歌，玩升Key；但就對流行曲、電視劇主題曲冇乜反應。」
而且Burger係隻義氣狗，每次小兩口初則談情繼而細細力動武之時，Burger就會奮不顧身，邊個郁手咬邊個。現場阿賓輕輕力拍阿Lin大髀，Burger即時撲出，出盡吃奶嘅力扯開阿賓；相反呢，佢就慢條斯理伏上阿Lin隻手上面「調停」，見冇效，最多都係咁意咬住阿Lin嘅衫袖扮調停。
同媽媽Jam歌
食硬聰明笨伯
兩年前，阿賓搵咗智商冇咁高嘅Oral-B（查理斯王騎士犬，CavalierKingCharlesSpaniel）陪Burger。兩隻拍埋，Oral-B就顯得好笨好烚，淨係識對住鏡頭儍笑。阿賓：「Burger識得聽命令食嘢，Oral-B重未講命令就已經食咗塊餅。而且個樣烚吓烚吓，成日俾Burger恰，咬到佢條尾同耳仔啲毛短晒。」Burger唔鍾意着衫，有次阿賓畀咗件警察衫Burger，Oral-B着咗超人衫，結果警察追咗超人幾條街，以暴力將超人剝得一絲不掛。
不過當Oral-B俾其他狗恰時，Burger亦會保護佢。例如Burger返屋企會幫Oral-B除狗帶；Oral-B行得慢，佢會停低等埋或者返轉頭搵佢。散步時，小倆口重會玩RolePlay，Burger扮獵犬（重使扮？），Oral-B扮獵物，然後分開走，Oral-B明明知道Burger伏緊佢，都會扮唔知，懵吓懵吓四圍行（極好戲！個懵樣連小記都俾佢呃埋！），Burger突然撲出，Oral-B就拔足狂奔，完全係DiscoveryChannel全紀錄，片段非常珍貴！
同電話鬥長氣
後記：虎父無犬女
小記眼中，索吻狂Burger已經夠變態，但原來兇徒父母重變態。「佢哋打交好得意㗎！」說罷阿賓同阿Lin就抱起兩狗，扶助佢哋互相熱身，兩狗互「車」兩拳正中腦門，瞬即動真火掙開雙方家長挾制。Burger率先發難直攻Oral-B後頸，Oral-B一個鯉魚翻身掙脫，反攻敵手後腳並且發出嗚嗚聲助威……望見兩隻狗狗咬狗骨，全屋人流露欣慰笑容，溫馨非常……
