張曼玉低調
傳媒將曼玉神化咗,佢只係普通人,有好多缺點。我同佢最大嘅拗撬,係佢唔鍾意做宣傳,九五、九六年已經係咁,佢話你睇王家衞做唔做宣傳,我話王家衞係表面唔做啫,你收咁貴片酬,係因為演技咩?百老滙演舞台劇嘅演員,演技夠好啦,佢哋收幾錢一晚?最值錢係演員嘅名氣,一個更好嘅演員,演技只會佔片酬兩成,八成係宣傳。當然我咁講有講笑成份,因為我同佢熟,大家先可以咁拗。我喺柏林影展同佢嗌交,大家唔睬,佢寫咗封信攝入我房,我又寫信攝入佢房,好有趣。
黎明純真
黎明經理人陳善之係我好朋友,到《甜蜜蜜》時,我覺得呢個角色非佢莫屬,個角色係大陸人,佢本身亦係,加上佢又有足夠嘅身份吸引全香港人去睇,呢套戲我覺得十拿九穩。拍戲嘅過程,我發覺黎小軍呢個角色好似佢,原來佢對愛情幾執着、幾純亦幾天真,我本來都以為黎明一定玩女無數,當時佢同我講佢嘅經歷,我先知原來佢喺愛情入面係下把位,而且重下把得幾緊要。(咁你同吳君如邊個係下把位?)吓,冇嘅喎,我都唔知喎,輪流做啩!
周迅憨直
佢份人好到不得了,但唔係好識講嘢,所以有啲驚記者,佢好易相處,但亦係硬頸之人,《如果.愛》三個主角都係咁,佢哋唔會乜都做,但亦唔會乜都唔肯做。
金城武食腦
有人話金城武好難搞,因為佢會問好多問題,但佢並唔係想挑戰導演嘅權威,佢係思想型,拍戲要問到覺得劇情合理為止,香港演員比較服從,但埋位可能做唔到。
志偉愛才
志偉一世人鍾意幫人,而且係有病態地幫,有一半導演都直接或者間接畀佢幫過,可以話係愛才,但唔係才佢都愛,所以有幫啱亦有幫錯。由做製片開始佢就幫我,直至九七年,我每開一部戲都同佢有關,到𠵱家我有大嘅決定都會問佢,唔問會唔舒服,我會形容佢係我大哥,以前喺片場個個叫成龍大哥,我只會叫佢Jackie,因為我唯一嘅大哥係志偉。
學友硬頸
學友做戲好準確,一講就知,聰明到不得了。佢形象親和,好似好就得人冇所謂咁,但其實佢份人最硬頸,佢只係想好隨和,佢好想做Mr.Nice,但佢一旦決定咗嘅嘢,一定唔會改。我同佢合作咁多套戲,有時想佢咁做得唔得,要扭轉佢比任何人都難,只係佢表達時唔會令人難堪,我識得咁多藝人,最硬淨係佢,同佢嘅pubicimage相反。
張國榮、梅艷芳遺憾
我覺得好可惜嘅係,當年拍《金枝玉葉II》,因為大家狀態都唔係幾好,一路想話搵一次機會再合作,但𠵱家冇咗咁嘅機會,好遺憾。佢兩個都係天生演員,一埋位就醒神。