楊千嬅成為家居水療器嘅產品代言人，噚日佢着得好性感咁出席喺銅鑼灣嘅宣傳活動，露咗少少乳溝，不過佢將大會貼紙貼喺心口，遮住心口，明顯係想露又驚嗰種。
大會安排咗個魔術師變魔術，現場觀眾都睇得好開心，可能同觀眾warmup完，當千嬅抽咗幾位觀眾上台玩遊戲時，有個女歌迷好熱情，主動要求抱抱，千嬅一話好，個女仔就即刻撲埋去攬實，好彩係女仔啫，如果唔係就蝕底晒。
司儀搶鏡
同個男觀眾玩遊戲嘅時候，千嬅又親手造面膜，重搽喺個男仔塊面度，雖然個面膜唔係整得咁好，但個男仔見係偶像親手整梗係唔拒絕啦，仲即刻擺甫士畀千嬅搽。幫埋另一個fans敷面膜嘅千嬅話：「我從來冇試過幫男仔做mask，就算以前拍拖都冇試過，做mask呢啲嘢要你情我願㗎！」
同場仲有司儀Kawaii性感演繹，佢因為太投入，喺台上落手落腳咁做，烏低身差啲走光，好彩千嬅件衫都唔輸蝕，唔係就俾人搶晒鏡。
