未到4月但唔知點解好鬼有兒童節氣氛！今星期連返兩套好鬼童真嘅《世紀大騙兔》同《逃出科幻紀》；前者唔使多講，華佬同掌門狗都上過大戲院，精品公仔大家都俾佢呃過唔少錢！後者就特別啲，係多年前羅賓威廉斯主演《逃出魔幻紀》重拍版，大橋冇變但副棋就變咗太空科幻版，兩套戲肯定睇得小朋友樂翻天！
記者、攝影：朱崇德
有時真係幾羨慕啲做DVD嘅發行，年假都過咗咁鬼耐，但佢哋嘅出碟態度都重係充斥住一份HolidayMood──歎慢板！大片欠奉、新片又冇乜好揀，你哋買碟固然愁，我要爬格仔搵飯食嘅就更怕飯碗不保；下星期應該好啲，有《無極》同《情義我心知》撐場，據聞3月更會搶閘出《鋼鍊》劇場版同《霍元甲》，苦痛嘅2月快啲過啦！
逐格拍攝工程浩大
睇得電腦動畫太多，對呢類泥膠公仔「手作仔」戲真係特別有好感！同早前介紹《怪誕屍新娘》一樣，《超》都係一套逐格拍攝嘅人偶戲，全齣戲雖只短短85分鐘，但據製作特輯所講，同一般電影一樣都係以1秒24格拍攝，合共拍攝咗115,000個鏡頭，工程真係浩大非常！
電影情節好簡單，華佬同掌門狗所住嘅村莊，村民們嗜好種一些超巨型蔬菜！不過唔好彩兔仔為患，所以華佬同掌門狗就組成了捉「兔」敢死隊，做其捉兔專家；正當一年一度「大大棵蔬果比賽」舉行在即，傳說中的人兔竟然出現，而且重對村民嘅蔬菜擇肥而噬；多番努力布下天羅地網為「騙兔」，但對呢隻「肥嘢」亦未見竟功，最後原來重局中有局！
泥膠公仔勁生鬼
雖然《超》嘅「泥膠公仔」造型簡單，間唔中重有少許跳格兼有手指模迹，不過我就係喜歡這一股復古味，而且人物動作亦見生鬼，好似以掌門狗為例，全套戲一句聲都冇出，但那種蠱惑、大智若愚同生鬼嘅動作，簡直係默劇聖手，以簡單一嚿泥膠做到呢個境界，都真係不得不服！
Bonus部份都幾強吓，導演講評、刪剪片段、相片集呢類基本嘢全部有齊；推介必睇嘅有泥膠小兔製作過程，簡單一條鐵線再加泥膠揑兩揑，就成隻兔仔出咗嚟，令人好有創作衝動；另外將隻碟放入電腦，重有門鎖牌、填色畫冊、面具、Postcard等DIY製作軟件功能！
同場加映：捉棋捉出禍《逃出科幻紀》
《逃出魔幻紀》可算是羅賓威廉斯多年前的經典，至於今個星期新返嘅《逃出科幻紀》，基本就是它的翻拍「太空版」！話說兩小兄弟在家中百無聊賴、終日鬧交，無意間發現一盒星際歷險遊戲，擲骰後，流星雨竟然穿透屋頂，像熾熱的火子彈在房間裏亂竄；流星雨過後，當他們往窗外一望，赫然發現房子懸浮在浩瀚無邊的宇宙裏，一段刺激驚險的星際旅程就此展開！
老實講，當年的《逃出魔幻紀》實在拍得太好喇！無論故事、特技，以至演員選角同音效配樂都近乎完美，所以如筆者呢類老Fans，雖然都叫睇得投入，但故事「照本」宣科，就好明顯有被比下去的感覺；不過據稱電影是第一集原製作班底製作，而為咗拍出真實感，好多爆破、火災場面，以至用油壓臂做10級大地震和魚叉插屋，都是「實景」拍攝，真係好有Heart好有真實感，如果是新戲迷，絕對值得一睇！
