大行減按揭息率，地產股開始有資金埋牙，莊士系旗艦莊士機構（367）去年9月底嘅NAV講緊1.93元，現價（0.66元）折讓66%，炒折讓，莊士一啲唔輸蝕。又集團家陣手頭資產，包括尖嘴莊士倫敦廣場、紅磡莊士紅磡廣場、灣仔莊士城市大廈及莊士企業大廈，總樓面42萬平方呎，件件底厚。
莊士正考慮將莊士紅磡廣場改建為酒店，亦已經聘請顧問將尖嘴莊士倫敦廣場全面改裝。可見莊士由以往靜局收息，轉為主動出擊，去提升物業收益及價值，呢批物業，97年時市值講緊42億銀，家陣帳面值不過25億銀，凸章17億銀增值部份，代表每股增值1.15元，重秤後NAV上到3.1元，莊士現價翻一番去到1.32元，不過係重秤後NAV嘅57%。上星期五，莊士以最近兩個月大成交（7球半）踢穿250日線，開始有味道，咪甩漏。
莊中折讓誇張炒得過
同系莊中（298）同期NAV1.35元，現價（0.46元）折讓近66%，祖國房地產股當中，莊中折讓，又係大到無倫。莊中去年3月底，手頭待發展或發展中物業，包括番禺、東莞及惠州市，地盤面積729萬平方呎。05年度（3月止）期間，又入股「湖南漢業房地產」54%，後者揸住湖南長沙一幅上1080萬平方呎土地發展權，令莊中喺祖國土儲，應佔權益超過1300萬平方呎（地盤面積）。又齋計地盤面積未來每方呎係咁意升值100蚊，已經可以為莊中增值13億銀或每股1.26元，係莊中現價1.7倍，聯想空間好大。Beforethat，莊中現價折讓誇張，已有得炒。
錢雋