由賓架出面號召的學術性會議，往往都獲得同行畀面支持而達到理想效果，好似由花旗香港行長陳子政做主席、財經事務及庫務局旗下嘅財經界人力資源諮詢委員會，噚日就同科大搞咗首次財經界與學術界圓桌會議。雖然近兩日翻起寒風，一朝早走入位處清水灣嘅科大開會，咪話唔辛苦，更何況出席嘅投資銀行及商業銀行賓架，日理萬機，個個都肯撥冗參加，認真有心。
TC（陳之洋名）話，出席嘅銀行及學術界嘉賓多達三十八人，很多都是業界重量級人馬，雙方就如何加強合作、未來市場挑戰、如何培育銀行特別是銀行界專才，藉以鞏固本港作為國際金融中心地位等議題，踴躍交流意見，科大教授陳家強都話，獲益良多。
八方所見出席會議嘅賓架，好多都係大型交易簽約儀式才露面嘅高層，包括高盛亞洲副董事長范華達、美林董事總經理黃桂林、大摩EdwardKing等，商業銀行則有滙豐保險蔡中虎、渣打營運總監洪丕正、中銀財務總監李永鴻等，金管副總蔡耀君亦代表監管機構。
爆料熱線：29290000、27860099
報料傳真：26239278
報料電郵：[email protected]