老實講，從《王子變青蛙》的片頭睇到男主角副尊容，真係唔明點解在台灣的收視會勁過《流星花園》。不過，好多嘢不能只看外表，就如去年年尾攞獎的歌手，除了一班唔係走音就係咪嘴的偶像歌手，好多都係唔Sell樣，靠一把靚聲，或自己作曲、自己編曲，一樣可以跑贏幾條街。
記者：馬靜兒 部份攝影：黃子偉
衞蘭新一代廣告女王
衞蘭Fans鎮定啲，我絕對唔係話衞蘭唔靚，只係佢把聲音較樣貌吸引。經朋友介紹為黎明做和音，後被東亞唱片發掘加入樂壇，成為今年女新人。一出道就挾着黎明師妹之名，雖然有人話佢麵包面，似肥版盧苑茵，但一年內人氣急升，連黎明上海個唱都找她當嘉賓。
首張大碟《Day&Night》的13首歌，雖全部翻唱師兄Leon的作品，但都熱賣2萬張，打入IFPI全年銷量榜第5位。樣貌雖不出眾，卻又拍麥當勞廣告，任換購史諾比廣告的代言人，再拍髮型用品ida廣告，玩百變形象。最厲害成為「3」手機最新代言人，連拍兩輯廣告，舞姿跳到街知巷聞。年尾贏埋叱咤女新人金獎，未來幾個月，她會把時間集中在唱歌方面。
Fans撐：聲線罕有
Vincent：「香港女歌手好少有衞蘭把聲，最記得佢係黎明師妹。」
樂評人黃志淙：
「她給人印象青春兼反叛，國語和廣東歌都有唱英文歌的特色，就是富時代感。」
側田一碟開Show
說側田不是Sell樣，相信無人反對。原是雷頌德旗下的作曲人，為古巨基寫了《大雄》及《傷追人》兩曲，推出旋即成為一時無兩的大熱歌曲。自去年在古巨基演唱會嶄露頭角後，一首《好人》亦打入各電台的歌曲流行榜，當新人已有機會與古巨基及楊千嬅往澳洲墨爾本拍音樂特輯。
首張唱片賣出3萬5張，成為其所屬公司05年最好賣唱片，又在叱咤拿了新人金獎。較早前雖被周刊拍到其Ｍ字額的相片，但依然無損Fans對他的喜愛。黃柏高更公開說想和他簽10年合約。年尾頒獎典禮奪得多個獎項，即成風頭躉。出道至今只出1碟，卻在3月於紅館開Show，門票開售10分鐘即賣清，唱片公司即決定4月加開1場。又一證明，Sell才華一樣得！
我有Say
「自己寫歌每次都要有靈感才會有感情，有感情的歌，樂迷也會有共鳴，可能因此就多人熟識。」
Fans撐：聽歌唔睇額
Capa：「佢首《好人》好好聽，唱高音都好穩定。」
Novia：「佢把聲真係唔錯，Ｍ字額都無所謂啦！」
樂評人黃志淙：
「一張碟開Show，經理人公司的市場推廣很成功，全部的歌都是自己寫，唱高音的部份叫人印象深刻，他的唱腔甚有R&B的感覺，他能作能編曲是一個很大的Bonus。」
鄭中基搞笑大王
唱片公司太子爺，初出道就傳出飛機上醉酒鬧事的負面新聞。轉捩點當然是電視《爆笑急轉彎》中扮女人獻醜，跟拍檔盧巧音搞盡笑料。他更乘勝追擊，再在《龍咁威》和《行運超人》發揮其搞笑細胞，即時大紅大紫。一曲《無賴》更大受歡迎，入選叱咤十大，入到卡啦OK，十個男仔八個唱《無賴》，連幾歲細路都識哼。即使經常跟楊千嬅和阿Sa傳緋聞，都無損其受歡迎程度。現在，他正在拍新片《至尊無賴》，繼續做「無賴」。
我有Say
「入行多年，我做每一樣事都好投入，投入自然忘我。大家只記得我做戲搞笑。我上台唱情歌，大家就笑，但好希望大家將我唱歌和做戲分開。」
Fan撐：演戲出位
Joel：「佢都係靠搞笑出位，但唱歌當然比好多上台就走音的歌手優勝好多啦！」
樂評人袁智聰：
「佢的搞笑形象太突出，蓋過佢唱得歌的身份，自從一首《無賴》令佢回歸歌手的本位，佢絕對是娛樂圈成功的例子。」
光良一曲紅透亞洲
光良個樣你未必認得，但佢首《童話》就無人不識，聽埋周圍朋友的電話鈴聲就知。
全亞洲賣了120萬張，邊個敢話唔紅？雖然正式進軍香港樂壇才半年，但已贏得「優秀流行國語歌曲金獎」。再夥拍人氣的衞蘭，拍3手機的廣告，3月就能於紅館舉行「光良第一次童話演唱會」，在香港紅的速度簡直快過打針。演唱會未開，3月頭又出新碟──光良《約定》首張創作記錄輯，擺明要乘勝追擊。香港的演唱會後，可能會計劃到國內開演唱會。
Fans撐：鍾意《童話》
Casper：「喜歡光良，係因為鍾意佢首《童話》，真的好好聽。」
樂評人黃志淙：
「最記得一首《童話》，無論唱功和形象都屬於文藝純情型，這類歌手在香港有市場空間。」
王菀之靚聲殺晒
王菀之能彈能唱，有把靚聲。她2000年贏得CASH流行曲創作大賽的冠軍，此後簽約成為作曲人，好明顯Sell才華啦！她任張學友的演唱會嘉賓，結果一鳴驚人，被稱為「王菲之後另一把天使的聲音」。出版了兩張唱片，包辦曲、詞、唱，銷量理想。多個樂壇頒獎禮都得新人獎及唱作人獎。有靚聲有才華，又掂！
Fans撐：靚聲冇得比
Catherine：「王菀之只是一把靚聲就已足夠，唔好將佢和其他得個樣的歌手相比。」
樂評人袁智聰：
「喜歡這位獨立歌手的聲線，她平靜的演繹方法，歌聲很有夜晚的Mood。」