我其實係許冠傑（Sam）歌迷，喺電台做DJ嗰陣，大概八○或者八一年，我已經想同佢做訪問，我寫咗一信畀佢，講晒我對佢所有歌嘅認識，同時又分析、解釋畀佢聽。阿Sam嗰陣唔會上電台做訪問，要去寶麗金嘅錄音室做，而且事前要睇晒的問題先肯做，做完訪問之後又有權話邊啲出得，邊啲唔可以出。
「一路食一路𦧲」
佢嚟到時攞住個雞皮紙袋，問：「你介唔介意我一路做訪問一路食啲嘢？」我話：「會唔會大聲呀，可能會收到聲。」佢話：「唔怕。」跟住佢就喺個紙袋度攞咗幾支嘢出嚟，估唔到佢竟然食蔗喎，啲蔗有渣，佢一路做訪問一路𦧲，佢真係好草根㗎！
阿Sam喺寶麗金時已經係歌神，後來過咗檔去康藝成音，嗰陣康藝成音有徐小鳳、關正傑，好巴閉，但佢去到嗰邊一敗塗地，亦都係佢最唔開心嗰幾年。佢拍完《最佳拍檔》之後，就簽番新藝寶，佢隻《最緊要好玩》亦係八六年喺新藝寶第一隻唱片，就係呢隻碟，歌神復活。
高山症打擊個唱
後來佢拍《衛斯理傳奇》患咗高山症，TVB頒獎畀佢隻《心思思》（八六年），我覺得佢冇事，只係體力唔夠，全部人話佢病，反對佢去攞，我同阿Sam講不如去啦，佢上咗台，連除衫都除唔到，佢全家人鬧到我趴街，不過阿Sam冇怨我。
當初係阿Sam將紅館由體育館變為演唱會場地。嗰次高山症，佢十幾場嘅演唱會變為三場，賣飛賣咗兩個幾月都唔爆，因為冇人想睇一個儍仔表演，嗰陣黃霑做廣告公司，佢同人guarantee（承諾）話可以開十場。第一場唱完，阿Sam冇事喎，我記得嗰晚俞琤上台喊，因為商台有份做贊助，都揩晒嘢，第二朝第二、三場啲飛即刻賣晒，冇期都夾硬加開一場，我記得約咗記者去西苑宣布呢個消息，去到啲記者都唔使寫，因為第四場已經爆棚，呢個世界就係咁現實。
想法完美煩親人
離開新藝寶之後，阿Sam又簽番寶麗金，但唱片賣得唔算好，兩年後佢意興闌珊，想寫退休歌，寫咗隻《急流勇退》，佢打電話畀我，話寫咗幾句歌詞，啲歌詞好正，其中有兩句「今天你為我高歌鼓掌，明天我是否依然是你的偶像」，聽到我毛管都戙埋，但最終佢都冇用到呢兩句歌詞，用咗「不奢望天長地久，只要是曾經擁有」，可能嗰陣鐵達時廣告成日播，多人識啦。
阿Sam佢份人冇嘢，但佢做每樣嘢都會諗好多問題，包括唔係問題嘅問題，上一次佢做三十八場道別演唱會，佢會將所有fans送嘅禮物，放喺一架手推車，推上台唱歌，佢係小心到咁嘅位，驚fans覺得唔知自己嘅禮物去咗邊，呢條橋係贏，但對我嚟講，係咪真係要咁完美呢？完美到大家好煩，丁點嘢都要諗，「我喺呢個位行開啲fans會唔會唔鍾意呢」，佢追求完美嘅程度，同張國榮比，張國榮算輕。
口述：陳少寶
撰文：張止寒
此欄逢星期六刊出
陳少寶（小寶）：曾是商台名DJ，先後擔任新藝寶、寶麗金唱片公司高層，一手捧紅王菲、Beyond，並曾和張國榮、許冠傑等巨星合作，九九年加入環球唱片任總裁，○三年離開，現為陳苑淇經理人。
