薛家燕（好姨）早排趁農曆新年去咗新加坡探訪當地嘅獨居老人，做吓善事，順便舉行佢復出十周年演唱會「家燕與您慶團圓」，好姨雖然唔係十八廿二，但都好好精力同好唱口，佢成晚一共唱咗二十幾首歌，仲有馬德鐘做表演嘉賓，睇到新加坡班擁躉拍爛手掌。
再遇癡心歌迷
好姨喺演唱會上大玩百變形象，分別模仿徐小鳳着波波裙、「菠蘿頭」嘅王菲look同埋風騷汪明荃，搞笑之極。好姨話：「我換衫嗰陣全部都係得幾秒鐘變身，重有六個人幫我換衫，時間好緊迫；最好笑係扮汪明荃套衫，胸前掛咗兩朵大菊花。」好姨仲話喺演唱會上重遇佢十六歲時結識嘅一位男歌迷，佢話：「佢當年為咗上台，重俾保安打到甩門牙，估唔到四十年後又再見番佢。」
