早排小初睇唔通嘅意馬國際（585），股價表現繼續叫人心猿意馬，噚日最高升至4.50元，收4.35元，勁升23.4％，成交股數280萬股，金額1172萬元，１個月唔夠，股價已經急升超過1倍。
經紀黃話，人哋意馬搞電腦動畫，乃係新興事物，估值方法與傳統廠佬生意唔一樣，投資者主要睇檔生意嘅未來潛力，而唔係睇家陣表現。近排有個基金密密大手增持，但大部份守舊散戶好似小初咁，想追又唔敢買。
另外，剛剛公布靚靚業績的筆克遠東（752），昨日股價應聲彈升，最高見過3.125元，收3.05元，大升10.91％，股價升上52周高位，噚日即刻有證券行出報告，調高筆克遠東目標價。
經紀黃話，隻股業績靚，其實有迹可尋，所以唔少芬佬已經埋晒位。據講公司有意藉收購擴大盤生意，隨時會集資。
慕容小初