小業主與信和集團打官司，贏咗，創下小人物打贏大老虎嘅多一個紀錄。前一單案件就係農婦逆權佔領農地，法官判業主恒基輸咗。
小業主係借助消費者委員會嘅訴訟基金嚟打官司嘅，據《蘋果日報》資料（二月十四日），消費者訴訟基金於九四年由政府撥款一千萬成立，目的係向消費者提供經濟支援及法律協助，至今累積支出一百八十三萬九千元。
咁啱呢日碰到一位知情人士，佢話消委會訴訟基金之成立，其實全靠霍德（前政務司）。話說當年消委會有意思幫助小人物對大老虎對抗，以訴訟為武器。但錢從何來呢？消委會高層見到霍德，陳述此意，霍德立刻話：「一千萬夠唔夠？」二話不說，就答應撥款一千萬元（呢個數目唔使立法局財務委員會批准。曾特首入住禮賓府，裝修費就係九百幾萬，以免立法會「阿支阿咗」），消委會當時其實重未有一套方案，聽見霍德即刻應承撥款，連忙撰寫建議書，向政府交代。
左丁山問知情人士：「假設係今日，你估政務司司長制唔制呢？」知情人士說：「都怕好難。當年港英政府真正強政勵治，立法局議員唔會出聲，霍德又作風強悍，夠膽孭飛，所以一講就掂。今日咁多人吼實，議員多聲氣，傳媒多批評，啲官員邊個唔係Ａ字膊呀，碰啱有個梁展文又夠膽運用酌情權，人人當佢係儍仔啦！」
咁又係，消委會好彩夠運碰啱霍德，否則「訴訟基金」到今日仍然未曾成立。知情人士又話，呢個訴訟基金之成立原意係用嚟打老虎嘅，等閒不輕易動用，有平民想同地產商打官司，可以考慮申請，不過理據要十分充份先至得。