學校資源唔夠，政府又無能為力，咁就惟有靠自己。好似有五十年歷史嘅聖芳濟書院，就搵到六四年畢業嘅校友、行會新貴范鴻齡認捐三百萬元，以配對形式籌集一個基金，總之你捐一蚊佢就捐一蚊，希望籌到一千萬，協助學校未來發展。范鴻齡噚日帶埋太太一齊返母校宣布呢個消息，又同班小師弟講吓以前讀書嘅趣事，兼且順道睇吓由佢早前資助而成嘅新圖書館。
食五百個豬腦補腦
范鴻齡話，佢小學讀書都幾叻，中學就派咗去一間工業學院，點知俾工業繪圖同埋鐵工呢兩科玩死，搞到幾乎神經衰弱，晚晚瞓唔着（可見讀書壓力大以前都一樣，並非現時啲學生先頂唔順），好彩佢阿爸之後幫佢轉讀聖芳濟，換咗個環境，啲修士好關心佢，令佢覺得處身大家庭，冇晒壓力；再加上依照中醫吩咐，日日食燉豬腦，食足四五百個！卒之好番晒，所以對母校感情特別深厚，有乜要幫手都冇推搪。
除咗講自己以外，范鴻齡又同班師弟在圖書館傾偈，重即場派名片畀大家，話大家有乜要求及建議，就直接搵佢，逗得一眾小師弟鬼咁開心。之後佢又主動同學生玩及影大合照，直頭係重返校園咁高興，范太趕時間開會要走先，佢都自己留低繼續傾。
聖芳濟雖然係傳統和尚寺，八方聽聞佢哋好開通，聖誕節可以接一車女校生嚟開party，梗係要問吓范鴻齡，當年有冇追吓隔籬學校嘅女仔？佢笑笑口話，當年最曳都係小息時，偷偷溜出學校門口買魚蛋食；至於追女仔，就梗係無啦！事關六十年代之時，唔好話女生，全校連一個女教師都冇，加上附近鬼咁荒涼，真係搵個女仔睇吓都難，又點追呢！
傳真︰2623-9278
電郵︰[email protected]