柱女KeepFit：做柱女　全身一齊減

記得月頭去睇大學Danso聯校比賽，見到女生着BraTop跳PoleDance，心諗「世風日下」囉！我知錯啦，原來喺外國PoleDance係Hit爆的健身運動，作為「國際都會」嘅香港真落後，全港得一位導師坐鎮。
唔講睇唔出，師傅Kate係兩子之母，佢全身都咁Firm，就係全靠呢條柱。

記者︰劉昱蘭　攝影︰伍慶泉
Model︰Kimmi&Charlie（TheGroup）

電影三級跳

一講PoleDance就令人想起鹹嘢，事出有因。夜總會有人跳鹹舞是事實，而電影就推波助瀾，戲中跳親PoleDance都係脫衣舞，隨手舉例有DemiMoore同埋NataliePortman，分別喺《脫衣舞孃》和《誘心人》都有PoleDance成人級演出。

■據知名模KateMoss閒時都係有學PoleDance健身，重曾經喺MV中大跳ShowOff。圖為03年TheWhiteStripes《Ijustdon'tknowwhattodowithmyself》MV。

■DemiMoore

燈光暗釋放野性

來自澳洲的導師Kate，兩年前喺家鄉開始學PoleDance，外國人都當學PoleDance好似學HipHop或去做Gym咁平常，而且係一個世界熱潮，佢嚟到香港教舞期間，識咗個來自冰島的學生，先知道原來冰島都興跳，所以話PoleDance真係Hit遍全球。
步進上堂地點BackroomBar，環境昏暗，Kate覺得咁上堂最啱︰「同你去做Gym好唔同，健身室度光線充足，係俾女士們Show身材。但我哋跳PoleDance，任何身材的人都歡迎，肥啲都可以好Sexy，地方黑啲就可以俾大家放膽盡Show女性美。」
好多運動都少不免會同人有比較，比拼吓邊個快啲勁啲，但跳PoleDance氣氛就好輕鬆，又可以見到大家釋放平日隱藏的野性一面，Relax心情。上咗4個月堂，唔願上鏡的學生Kelly曾學過多種舞蹈，都覺得PoleDance最有健身效果，協調度同肌肉耐力都大增。有興趣學嘅你一定會問：咁如果學完想練，唔通喺屋企要裝碌柱先得？據Kate透露，有興趣嘅可以喺美國代訂一條伸縮柱，只要將塊墊仔放喺地下，天花加個鈎，就可以固定，易裝易拆。售價約$2,400。

柱女裝備

柱

最緊要，無佢就無得跳！如果想喺屋企跳，可以由美國訂即裝即跳嘅伸縮柱返來。

衫

緊身衫褲就OK，此外無特別要求。

鞋

一般都着高踭鞋，無他嘅，為咗個Sexy嘅效果啫。唔着一樣跳得靚！

運動每一塊肌肉

女士們最怕麒麟臂、大髀粗，皆因最難減，而PoleDance，最能針對呢兩個弱點加強訓練，其特點是手腳並用，運動量大，保證每一塊肌肉都運動到，動作又考力水，肌肉想唔Firm都唔得。跳時會無時無刻捉實條柱，平日冇幾何郁動到的三頭肌ByeBye肉都冇得偷懶；而基本動作「Dip」則針對下身，要雙腳屈曲，同時個Hip要左右搖擺。Dip係PoleDance的基本動作，意態撩人之餘，大髀重會慢慢收緊，練出耐力。