港股算硬淨，日股散330點，恒指仍有進帳24點。指數變化雖然唔大，但窩輪有槓桿效應，例牌有個別飛沙走石。
聯想C輪9314：聯想（992）上月尾派的成績表，唔多靚，由3.40元散到3元，投降貨消化後，低位反彈，昨收3.225元，升3.2%。結果窩輪龍虎榜上，聯想C輪有4件入圍，升幅由25%至34%。基金股即使盤數唔靚，但跌到咁上下，一樣會反彈，最多彈完再跌，然後跌完又再升彈。等吓，等聯想再落幾個位，執C輪博反彈。正路之選係9314，4月上旬夠鐘，輪價30仙，溢價3.9%，槓桿率10.8倍（有效7.3倍），引伸波幅40.5%。
招商局C輪9955：招商局（144）升3.8%，喺恒指成份股中排第1，有成交C輪升幅由15%至21%。睇數據搵C輪，結合埋成交，9955最睇得上眼。隻輪6月初到期，輪價4.90元，溢價0.1%，槓桿率4.4倍（有效4.1倍），引伸波幅34.5%。不過，正股已升咗咁多，去年10低位至今上咗1半，驚住高價不勝寒，𠵱家先至買C輪，都要諗埋正股回吐嘅因素。
中旅公司輪1214：中旅（308）收2.15元，跌兩格。備兌C輪9165跪低，散43%。隻輪下月尾夠鐘，行使價2.55元，救得番嘅機會好低，輪價2仙，咪貪平，因住冇得剩。中旅再跌，有吸引力，買公司輪1214。隻輪5月尾夠鐘，輪價62仙，負溢價1%，槓桿率3.5倍。咁嘅槓桿率，當然唔好期望有強勁爆炸力。
章盛