特首曾蔭權搬入禮賓府，噚晚首度有人漏夜衝上去靜坐求見，來者卻唔係民主派而係左派，唔知有冇阻佢瞓覺。
事緣老牌建築商德信「爛尾」工程，地盤被房屋署收回，連累大班判頭同工人冇糧出，職工盟同工聯會噚日分別帶齊人馬到房署講數，傾咗六個鐘頭後，職工盟代表笑咪咪離開，工聯會嘅立法會議員王國興卻怒氣沖沖同埋工人衝上禮賓府，要求同煲呔直接對話。
拍板收回地盤嘅房委會建築小組主席葉國謙，亦都係民建聯副主席，要同黨友王國興傾掂數應該唔難，不過阿謙話同情工人，但冇call王國興「擺平」件事，特首辦亦冇搵佢幫手，所以佢一於少理，「工人追返血汗錢好合理，採取咩行動冇所謂。」
職工盟今次「得米」，因為搵佢哋幫手嘅係德信直屬僱員，房屋署可以按規矩喺德信工程保證金中撥出款項支付欠薪，搵工聯會求助嘅主要係判頭同工人，房屋署就企硬唔墊支。
據講工聯會喺談判桌上狠批房署監管不力，連阿謙都鬧埋，左派打自己友，一眾官員聽到都覺得好笑。
傳真︰2623-9278
電郵︰[email protected]