大家唔好誤會，你唔係揭錯寵物版，呢版依然係車版，只不過今期係報道smartclub嘅Petday。當日所有smart車主同自己隻寵物都齊齊亮相，夠晒熱鬧，難得可以車Pet同樂，當然要報道一下，即刻去片帶你睇番當日嘅盛況！
記者：黃婉冰
攝影：何家亮
車會搞聚會，不外乎遊吓街，燒吓嘢食，飲茶吹水，而smartclub就零舍多搞作，早前就搞過一個Dressupparty，幫架車扮鬼扮馬鬥靚，今次就Petday，實行與Pet同樂。當日個個揸住架smart載住隻寵物「一家大細」到現場，車主講車經，寵物就自己聯誼，人Pet打成一片，大會重特別加設「最Pet似主人形」、「最難忘片段」同「最得人心寵物」三個獎項，齊齊遊車河之餘，又可以畀隻寵物見吓大場面。
smartcar三代同堂
對寵物唔多有興趣嘅我嚟講，Event未開始，人人玩狗睇狗之際，我就好似去車展睇車咁在場搜羅我嘅目標車輛，睇勻全場，smartfortwo、smartforfour、roadstercoupe，咦，三代同堂喎，縱觀smartfortwo就最車多勢眾，閒閒哋都有十幾二十架，排排企咁泊埋一齊，個畫面就好似去咗天神村咁，一架架車仔同狗仔喺你身邊四圍走，夠晒熱鬧。
車會自設急救隊
拍攝期間同位車主Lucy傾偈，佢覺得車會聚會好好玩同開心。「Club係smart嘅一個賣點，咁多架smart一齊玩好開心㗎，我覺得佢哋個Website做得幾好，又有一個急救隊，唔好彩架車有咩事或者喺街跪低咗，佢哋盡可能都會派人嚟幫手，我覺得呢個Concept幾好。」Lucy表示。
小車載巨犬
令我有興趣訪問Lucy嘅原因，係因為佢架車仔同隻大拉布拉多犬Latte。見到佢架smartfortwo車尾有隻龐然大狗郁吓郁吓，細細架車載住隻巨犬，望落都幾相映成趣，即刻走埋去同佢影番輯靚相，順便問埋Lucy點解屋企有隻大狗唔買架大車呢？
「香港未有smart嗰時我已經好鍾意，佢個車頭好似笑緊咁，揸出街好多人望，重送埋個iPodkit，咁嘅價錢有埋軚盤+/-波，我覺得好抵玩。我自己本身都有打開Golf，個尾箱成套Golf球棍都放得落，所以我知道用嚟載Latte實夠位，其實佢個內櫳都OK大㗎，之前見過有對外籍人士Member，佢哋身形咁健碩坐落去都係咁喇，我覺得內櫳同普通車分別唔大。」Lucy笑說。
為狗換forfour
講到全場個車……尾最搶鏡，非Andy呢架莫屬，睇佢將架車貼滿晒得意嘅雪橇犬貼紙，重有大大個Husky字樣就知佢愛狗程度有幾深。「我以前揸開新款MINICOOPER，但年幾前開始養太郎，經常帶住佢四圍去，去啲地方又遠又長途，MINI得兩隻門，個車廂又細，佢屈住會好辛苦，所以我特登換咗呢架forfour。我鍾意呢架車個尾箱夠大，揭背式設計，可以畀佢好輕易咁跳上車，又有足夠空間走動。」嘩，為咗隻愛犬特登換車，Andy呢個主人真係跟得過！
fortwo有速度感
smartfortwo真係咁好？唔信，再搵多個車主問問先，四圍遊，識到Zona同佢老公Alex，佢哋都係揸smartfortwo，佢點解會揀fortwo，唔揀forfour或者Roadstercoupe？「自己本身已經有架寶馬Z4同Golf，加上又鍾意兩座位嘅車，我覺得fortwo係smart嘅經典，作為一架Citycar，佢個操控幾好，好Userfriendly，有Turbo、+/-波，好似高卡車咁，佢速度唔會好快，但就可以畀到個速度感你。另一樣我幾欣賞嘅係佢個車架，夠紮實，好安全，並唔係好多人所諗細細架好兒嬉，鋼水差。」
