好耐冇見經紀榮，佢喺中環返工，一到周末就換上一身APE裝，穿梭銅鑼灣同旺角，好不招搖。今日佢部3G電話換上猿人電話繩，於威靈頓街蛇竇暢談中環事：「APE已定於4月1日喺大道中舊Issue開舖，𠵱家圍晒板好不壯觀，但班搞手一定唔係中環人，唔熟悉嗰頭地理環境，事關嗰度唔畀排隊，前幾年麥記搞換購活動，引嚟大班巿民排隊，搞到附近律師樓班大狀好唔方便，所以好快有差人嚟趕。APE咁賣弄排隊文化，呢次肯定係個大考驗！附近新世界門口有個報紙檔女仔，本來都係猿人迷，不過佢話𠵱家香港開咁大間舖，牌子唔夠矜貴，以後只會將APE當底衫着，真招積！
我就冇乜所謂，你見我一身APE襯GUCCI再襯Y3，就知我係一個Fashionvictim喇！講開又講，呢輪中環最型蒲點一定係四季酒店，並非置地文華，事關好多人投訴置地文華門口班侍仔唔識做。好似早排我老細，幾億身家但仍鍾意搭公司架爛鬼貨Van做順風車，嗰日想喺置地文華門口落，會合佢老婆入去食飯，點知就俾個侍仔趕車，可能人哋以為佢係裝修工人，所以用門口唔畀貨Van停為藉口趕人，實在有眼不識泰山。如果佢學我以APE襯GUCCI再襯Y3，肯定冇事！」
大食Jack（[email protected]）